لاہور۔19جنوری (اے پی پی):کالم نگار، شاعر اور ڈرامہ نویس منو بھائی کی 7 ویں برسی 19جنوری بروز اتوارکو منائی گئی۔منو بھائی 6 فروری 1933 کو وزیرآباد میں پیدا ہوئے، انکا اصل نام منیر احمد قریشی تھا۔ انہوں نے گریجوایشن گورنمنٹ کالج اٹک سے کی اور مختلف اخبارات میں ادارتی عہدوں پر بھی فائز رہے۔
انہوں نے پاکستان ٹیلی ویژن کیلئے متعدد ڈرامے لکھے۔ ان کا سب سے مشہور ڈرامہ” سونا چاندی” تھا جبکہ دیگر ڈراموں میں دشت اور آشیانہ بھی بے حد مقبول ہوئے۔ انہوں نے ہزاروں کالم بھی لکھے،بحیثیت صحافی انہوں نے سیاست سے لے کر ثقافت کو قریب سے دیکھا تھا اس لئے ان کی شاعری میں حقیقت نگاری کا عنصر نمایاں ہے۔
منو بھائی کی مشہور تصانیف میں محبت کی ایک سو نظمیں، جنگل اداس ہے اور انسانی منظر نامہ شامل ہیں۔منو بھائی نے تھیلیسیمیا میں مبتلا بچوں کیلئے سندس فائونڈیشن کی بنیاد رکھی جس کے وہ تاحیات چیئرمین رہے،
اس فائونڈیشن سے مستحقین کے زخموں پر آج بھی ایسے ہی مرہم رکھا جا رہا ہے جیسے ان کی حیات میں جاری تھا۔ انہیںصحافت اور ادب میں بہترین خدمات پر تمغہ برائے حسن کارکردگی سے نوازا گیا، وہ طویل علالت کے بعد 19 جنوری 2018 کو 85 سال کی عمر میں لاہور میں انتقال کر گئے تھے۔
Short Link: https://urdu.app.com.pk/urdu/?p=548335
