معیشت کی بہتری ، ایندھن کی مد میں درآمدی بل میں کمی کے لئے شمسی توانائی کافروغ نا گزیر ہے،وزیراعظم شہبازشریف کااجلاس سے خطاب

اسلام آباد۔22دسمبر (اے پی پی): وزیراعظم محمد شہباز شریف نے کہا ہے کہ شمسی توانائی وقت کی اہم ضرورت ہے، معیشت کی بہتری اور ایندھن کی مد میں درآمدی بل میں کمی کے لئے شمسی توانائی کا فروغ نا گزیر ہے ،شمسی توانائی پر منتقلی سے سرکاری اداروں کے بجلی کے بلوں میں خاطر خواہ کمی ہو گی ۔ ان خیالات کا اظہار انہوں نے ملک میں شمسی توانائی کے فروغ کے حوالے سے اجلاس کی صدارت کرتے ہوئے کیا۔ اجلاس میں وفاقی وزیر خزانہ و محصولات اسحاق ڈار ، وفاقی وزیر تجارت سید نوید قمر ، وفاقی وزیر توانائی انجنیئر خرّم دستگیر ، مشیر وزیراعظم احد چیمہ ،وزیراعظم کے معاونین خصوصی محمد جہانزیب خان ، طارق باجوہ اور اعلیٰ سرکاری افسران نے شرکت کی۔

وزیراعظم نے اجلاس سے خطاب کرتے ہوئے کہا کہ شمسی توانائی صاف اور سستی بجلی حاصل کرنے کا بہترین ذریعہ ہے اور وقت کی اہم ضرورت ہے۔ وزیراعظم نے کہا کہ معیشت کی بہتری اور ایندھن کی مد میں درآمدی بل میں کمی کے لئے شمسی توانائی کا فروغ نا گزیر ہے۔ انہوں نے مزید کہا کہ نجی سطح پر بھی شمسی توانائی کے استعمال کو فروغ دینے کے حوالے سے ضروری اقدامات کئے جائیں۔ اجلاس میں بتایا گیا کہ وفاقی کابینہ ملک بھر میں مہنگے ایندھن کی جگہ شمسی توانائی سے بجلی پیدا کرنے کے حوالے سے فریم ورک منظور کر چکی ہے ۔

بریفنگ میں مزید بتایا گیا کہ نیشنل الیکٹرک پاور ریگولیٹری اتھارٹی اس مہینے کے اختتام تک شمسی توانائی کے بڑے پراجیکٹس کے ٹیرف کا تعین کر لےگی جس کے بعد متبادل توانائی کی ترقی کے بورڈ کی جانب سے سرمایہ کاروں سے بولیاں طلب کی جائیں گی۔ بریفنگ میں مزید بتایا گیا کہ شمسی توانائی سے بجلی پیدا کرنے کے حوالے سے تین منصوبے زیر غور ہیں جن میں 1200 میگا واٹ کا منصوبہ لیہ میں جبکہ 600 میگا واٹ کے منصوبے مظفر گڑھ اور تریموں میں لگائے جائیں گے۔

وزیراعظم نے ہدایت کی کہ اس حوالے سے آر ایف پی اور بڈنگ کا کام تیز تر اور شفاف بنانے کے حوالے سے تمام متعلقہ محکمے ضروری اقدامات کریں۔ اجلاس کو وزیراعظم کے وفاقی حکومت کی ملک بھر میں موجود عمارات کی شمسی توانائی پر منتقلی کے ویژن پر بھی بریفنگ دی گئی۔ اجلاس کو بتایا گیا کہ وفاقی حکومت کی عمارات کی شمسی توانائی پر منتقلی کے حوالے سے ماہر کنسلٹنٹ کی خدمات حاصل کی گئی ہیں۔

وزیراعظم نے ہدایت کی کہ اس سلسلے تمام وفاقی اداروں کے لئے سینٹرلائزڈ پروکیورمنٹ کو اختیار کیا جائے جو کہ مؤثر اور شفاف ہو۔ وزیراعظم نے ہدایت کی اس سلسلہ میں ابتدا اسلام آباد کی حدود میں وفاقی حکومت کی عمارات سے کی جائے اور بعد ازاں پورے ملک میں موجود سرکاری عمارات کو شمسی توانائی پر منتقل کیا جائے۔ وزیراعظم نے ہدایت کی کہ گرمی کا موسم شروع ہونے سے پہلے سرکاری عمارات کی شمسی توانائی پر منتقلی کو یقینی بنایا جائے۔ وزیراعظم نے کہا کہ شمسی توانائی پر منتقلی سے سرکاری اداروں کے بجلی کے بلوں میں خاطر خواہ کمی ہو گی۔

Short Link: https://urdu.app.com.pk/urdu/?p=342794