بھارتی حملے کو پسپا کرنے پر پاک فوج سے اظہار یکجہتی کےلئے ملتانی سڑکوں پر نکل آئے

ملتان۔ 07 مئی (اے پی پی):بھارت نے اس بھرپور جوابی کارروائی کے خوف سے سفید جھنڈا لہرا کر شکست تسلیم کر لی۔بھارتی جارحیت کے خلاف دیگر شہروں کی طرح ملتان میں بھی شہری سڑکوں پر نکل آئے اور اپنی افواج سے بھرپور اظہارِ یکجہتی کےلئے پاک فوج زندہ باد اور پاکستان پائندہ باد کے نعرے لگائے۔

پرانا شجاع آباد روڈ ، وہاڑی روڈ ،خانیوال روڈ اور دیگر مقامات پر ملتانیوں کا جوش دیدنی تھا۔شہری محمد عاصم نے اے پی پی سے بات چیت کرتے ہوئے کہا کہ اگر ضرورت پڑی تو پوری قوم اپنی افواج کے ساتھ مل کر بھارت کو منہ توڑ جواب دے گی۔تاجر برادری نے بھی اپنی بہادر پاکستانی فوج سے اظہارِ یکجہتی کرتے ہوئے کہا کہ بھارت جان لے کہ ہمارے غیور عوام اور افواج اپنے ملک کا دفاع جانتے ہیں۔

شیراز رفیق اعوان کا کہنا تھا کہ ہماری سرحدوں کا دفاع مضبوط ہاتھوں میں ہے۔ڈاکٹر خلیل احمد کا کہنا تھا کہ ہمارا ایک ایک سپاہی اور شہری اپنے ملک کا دفاع کرنا جانتا ہے۔نواز شریف زرعی یونیور سٹی کے طالبعلم کاشف نے پاک فوج زندہ باد اور پاکستان پائندہ باد کے فلک شگاف نعرے لگا کر اپنی بہادر فوج کے ساتھ شانہ بشانہ لڑنے کے عزم کا اظہار کرتے ہوئے کہا کہ تمام نوجوان اپنے ملک کی حفاظت کےلئے تیار ہیں۔

Short Link: https://urdu.app.com.pk/urdu/?p=593747