ملتان۔ 16 دسمبر (اے پی پی):محکمہ زراعت پنجاب نے ماہ دسمبر کے دوسرے پندھرواڑے کے دوران گندم کی بہتر نگہداشت کیلئے سفارشات جاری کردیں۔ ترجمان محکمہ زراعت کے مطابق کپاس، مکئی اور کماد کے بعد کاشتہ گندم کو پہلا پانی بوائی کے 20 تا 25 دن بعد جبکہ دھان کے بعد کاشتہ گندم کو 35 تا 45 دن بعد لگایا جائے ۔
گندم کو بقیہ نائٹروجن پہلے اور دوسرے پانی کے ساتھ برابر اقساط میں استعمال کریں جبکہ ریتلے علاقوں میں تین برابر اقساط میں ڈالیں کیونکہ ایسی زمینوں میں اس کے ضائع ہونے کا احتمال زیادہ ہوتا ہے۔ جہاں فاسفورسی کھاد نہیں ڈالی گئی وہاں پہلے پانی کے ساتھ استعمال کریں۔
پچھیتی کاشت کی صورت میں کھادوں کی پوری مقدار بوقت بوائی استعمال کریں۔ اگر ممکن ہو تو پہلی آبپاشی کے بعد کھیت وتر حالت میں آنے پر دوہری بار ہیرو چلائیں۔ اس سے جڑی بوٹیاں بہت حد تک تلف ہو جاتی ہیں اور زمین میں وتر دیر تک قائم رہتا ہے۔ جڑی بوٹیاں گندم کی پیداوار کو 42 فیصد تک کم کر سکتی ہیں۔ یہ جڑی بوٹیاں گندم کی فصل میں پانی، کھاد اور دیگر وسائل کے ضیاع کا باعث بنتی ہیں۔
اس لیے گندم کی فصل سے جڑی بوٹیوں کی تلفی کے لیے مربوط طریقہ انسداد اختیار کریں۔جڑی بوٹیوں کی تلافی کے لیے کیمیائی زہروں کا استعمال محکمہ زراعت کی سفارشات کے مطابق کریں۔معیاری سپرے کے لیے مخصوص نوزل (ٹی جیٹ یا فلیٹ فین ) استعمال کریں۔ تیز ہوا، دھند یا بارش میں سپرے نہ کریں۔
زہر کے چھڑکاؤ کے بعد گوڈی اور بار ہیرو کے استعمال سے پر ہیز کریں اور جڑی بوٹیوں کو چارہ کے طور پر ہر گز استعمال نہ کریں۔ ریتلے اور کلر اٹھے علاقوں کی زمینوں میں جڑی بوٹی مار زہروں کا استعمال محکمہ زراعت کے عملہ کے مشورہ سے کریں۔جڑی بوٹیوں کے انسداد کے لیے سپرے ہمیشہ کیلی بریشن کر کے کریں۔ پانی کی مقدار 100-120 لیٹر فی ایکڑ رکھیں۔ کسی جگہ دوہری سپرے نہ کریں اور نہ ہی کوئی خالی جگہ رہنے دیں۔
Short Link: https://urdu.app.com.pk/urdu/?p=536700
