ملتان۔ 13 مارچ (اے پی پی):وزیر اعلیٰ کی معاون خصوصی برائے پرائس کنٹرول سلمیٰ بٹ نے دورہ ملتان کے دوران مستحقین کے گھروں میں جاکر رمضان نگہبان پیکج کی امدادی رقوم دیں۔ڈپٹی کمشنر محمد علی بخاری اور اسسٹنٹ کمشنر سٹی عبدلسمیع شیخ نے بریفنگ دی۔ سلمیٰ بٹ نے ضلعی انتظامیہ کے اجلاس کی صدارت بھی کی اور کارکردگی چیک کی ۔اس موقع پر انہوں نے کہا وزیراعلیٰ مریم نواز شریف نے مستحق طبقے کیلئے تاریخی نگہبان رمضان پیکج دیا ہے ۔
معاون خصوصی سلمیٰ بٹ نے کہا کہ ضلع ملتان کے ایک لاکھ 6 ہزار سے زائد مستحق افراد کو پے آرڈر مل چکے۔ضلعی انتظامیہ کی جانب سے سہولت رمضان بازار میں واضح ریلیف فراہم کیا گیا ہے ۔انہوں نے مزید کہا صوبے بھر میں 80 سے زائد رمضان سہولت بازار قائم کئے گئے ہیں۔
اس موقع پر ڈپٹی کمشنر ملتان محمد علی بخاری نے کہا ر مضان سہولت بازاروں میں مارکیٹ سے 60 روپے فی کلو تک اشیاء سستی مل رہی ہیں۔چینی کی 130 روپے فی کلو فراہمی سے عوام کو براہ راست ریلیف ملا۔ چینی سمیت تمام اشیاء خوردونوش کی قیمتوں کو مستحکم رکھنے کیلئے کوشاں ہیں۔ حکومت پنجاب کی ہدایت پر ضلع بھر میں سستی چینی کاؤنٹر قائم کئے گئے ہیں۔
Short Link: https://urdu.app.com.pk/urdu/?p=572141
