فیصل آباد۔12دسمبر (اے پی پی):ملکی معیشت کیلئے کلیدی اہمیت کی حامل اہم نقد آور فصل کپاس کے پیداواری منصوبہ کی منظوری دیدی گئی۔ اس ضمن میں ایک اہم اجلاس ایڈیشنل ڈائریکٹر جنرل (فارم اینڈ ٹریننگ)پنجاب اشتیاق حسین کی زیر صدارت ایوب زرعی تحقیقاتی ادارہ فیصل آباد میں منعقد ہوا جس میں کپاس کے پیداواری منصوبہ2023-24 پر تفصیلی تبادلہ خیال کیا گیا۔
اس موقع پرپرنسپل سائنٹسٹ ڈاکٹر غلام سرور نے اجلاس کے شرکا کو بتایا کہ پاکستان کی ملکی معیشت میں کپاس کو کلیدی حیثیت حاصل ہے کیونکہ اس سے ٹیکسٹائل مصنوعات تیار کی جاتی ہیں جبکہ اس کے بنولے کا تیل بناسپتی گھی کی تیاری کیلئے استعمال ہوتا ہے نیز کپاس پیدا کرنیوالے ممالک میں پاکستان کو اہم مقام حاصل اورپنجاب کو اس لحاظ سے خصوصی اہمیت حاصل ہے کیونکہ مجموعی پیداوار کا تقریباً 70 فیصد پنجاب میں پیدا ہوتا ہے۔
علاوہ ازیں ملکی روزگارکا تقریباً 30فیصد کپاس کے متعلقہ امور سے منسلک ہے اسلئے کپاس کی بھرپور پیداوار حاصل کرنے کیلئے کپاس کے کاشتی عوامل کی بہت اہمیت ہے۔
انہوں نے کہاکہ پاکستان کو کپاس اور اس کی مصنوعات کی برآمد سے کثیر زرمبادلہ حاصل ہوتا ہے تاہم کپاس کی فی ایکڑ زیادہ پیداوار کا انحصار موزوں موسمی حالات کے علاوہ زرعی مداخل کے بہتر استعمال اور بروقت تحفظ نباتات پر ہے۔
انہوں نے کہا کہ امسال کپاس کے مرکزی وثانوی علاقوں میں کپاس کی فصل کی بڑھوتری بہتر رہی ہے اور بہتر آف سیزن اور آن سیزن مینجمنٹ کی وجہ سے گلابی سنڈی کا حملہ بھی کنٹرول میں رہا ہے۔
اجلاس میں کپاس کے پیداواری منصوبہ 2023-24 کی تشکیل کیلئے مختلف موضوعات زیر بحث لائے گئے جن میں کپاس کی کاشت سے لیکر برداشت تک کے عوامل اور اسکی ترقی دادہ اقسام کی کاشت کیلئے موزوں آب و ہوا، شرح بیج، وقت کاشت، زمین کی تیاری، طریقہ کاشت،کھادوں اور پانی کا استعمال، چھدرائی، گوڈی، جڑی بوٹیوں کی تلفی، کیڑوں اور بیماریوں سے تحفظ کے حوالے سے ماہرین کی رائے لی گئی۔
کپاس کی پیداواری ٹیکنالوجی کے حوالے سے زرعی ماہرین نے تحقیقاتی اداروں میں کپاس پر کی جانیوالی تحقیق کے نتائج اور سفارشات سے آگاہ کیا۔بعدازاں پیداواری منصوبہ کپاس 2023-24 کے مسودہ کوچند ضروری ترامیم کے بعد منظور کرلیا گیا۔
Short Link: https://urdu.app.com.pk/urdu/?p=341322
