راولپنڈی۔ 15 مئی (اے پی پی):16 مئی کو ملک بھر کی طرح راولپنڈی ڈویژن میں بھی یوم تشکر قومی اور ملی جذبے کے ساتھ منایا جائے گا۔ تفصیلات کے مطابق پاکستانی عوام اور افواج پاکستان کو خراج تحسین پیش کرنے اور معرکہ حق میں تاریخی فتح پر ملک بھر کی طرح راولپنڈی ڈویژن میں بھی 16 مئی جمعہ کویوم تشکر منایا جائے گا۔ یوم تشکر کے موقع پر دن کا آغاز مسجدوں میں قرآن خوانی اور خصوصی دعاؤں سے کیا جائے گا۔ وفاقی درالحکومت میں 31 جبکہ صوبائی دارلحکومت میں 21 توپوں کی سلامی دی جائے گی۔
مزار قائد اور مزار اقبال پر گارڈز کی تبدیلی کی تقریب کا انعقاد کیا جائے گا۔ ملک بھر کی طرح راولپنڈی ڈویژن میں بھی پرچم کشائی کی تقریبات منعقد کی جائیں گی۔ ملک بھر میں یادگار شہداء پر پھول رکھے جائیں گے اور دعائیہ تقریب منعقد ہوں گی۔سرکاری و نجی مقامات پر پاکستانی پرچم بھی لہرایا جائے گا۔ نماز جمعہ کے خطبات میں شہداء اور غازیوں کی قربانیوں کو خراج تحسین پیش کیا جائے گا اور ملکی سلامتی کے لیے دعا بھی کی جائے گی۔ آپریشن بنیان مرصوص کے شہداء کو خراج عقیدت پیش کرنے کے لیے ان کے لواحقین سے خصوصی ملاقاتیں کی جائیں گی۔
P
Short Link: https://urdu.app.com.pk/urdu/?p=597605
