اسلام آباد۔23جون (اے پی پی):ملک سے چاول کی برآمدات میں جاری مالی سال کے پہلے 11 ماہ میں سالانہ بنیادوں پرنمایاں اضافہ ریکارڈکیاگیاہے۔ پاکستان بیوروبرائے شماریات اورسٹیٹ بینک کی جانب سے جاری کردہ اعدادوشمارکے مطابق مالی سال کے پہلے 11 ماہ میں چاول کی برآمدات سے ملک کو3.397 ارب ڈالرکازرمبادلہ حاصل ہوا جوگزشتہ مالی سال کی اسی مدت کے مقابلہ میں 74.51فیصدزیادہ ہے، گزشتہ مالی سال کی اسی مدت میں چاول کی برآمدات کاحجم 1.946 ارب ڈالرریکارڈکیاگیاتھا، مئی 2024 میں چاول کی برآمدات سے ملک کو333.32 ملین ڈالرکازرمبادلہ حاصل ہوا
جواپریل میں 373.71 ملین ڈالراورگزشتہ سال مئی میں 208.08 ملین ڈالرتھا، مالی سال 2023 میں چاول کی برآمدات کا مجموعی حجم 2.107 ارب ڈالرریکارڈکیاگیاتھا۔ اعدادوشمارکے مطابق جاری مالی سال کے پہلے 11 ماہ میں باسمتی چاول کی برآمدات کاحجم 786.01 ملین ڈالرریکارڈکیاگیا جوگزشتہ مالی سال کی اسی مدت کے مقابلہ میں 40.62 فیصدزیادہ ہے، گزشتہ مالی سال کی اسی مدت میں باسمتی چاول کی برآمدات سے ملک کو558.93 ملین ڈالرکازرمبادلہ حاصل ہواتھا۔اسی طرح جاری مالی سال کے دوران نان باسمتی چاول کی برآمدات سے ملک کو2.611 ارب ڈالرکازرمبادلہ حاصل ہواجوگزشتہ مالی سال کی اسی مدت کے مقابلہ میں 88.16فیصدزیادہ ہے، گزشتہ مالی سال کی اسی مدت میں نان باسمتی چاول کی برآمدات سے ملک کو1.387 ارب ڈالرزرمبادلہ حاصل ہواتھا۔
Short Link: https://urdu.app.com.pk/urdu/?p=478255
