اسلام آباد۔7مئی (اے پی پی):پاکستان پیپلز پارٹی (پی پی پی)کے سیکرٹری اطلاعات ندیم افضل چن نے بھارت کی جانب سے پاکستان پر حملے کی شدید الفاظ میں مذمت کرتے ہوئے کہا ہے کہ ملک عزیز کی حفاظت کے لئے پوری قوم متحد ہے ، پاکستان جنگ نہیں چاہتا مگر اپنی حفاظت کے لئے ہر حد تک جائیں گے، بھارتی جنگی جنون خطے کی سلامتی کے لئے خطرہ ہے۔
بدھ کو پی پی پی میڈیا سیل سے جاری مذمتی بیان میں ندیم افضل چن نے کہا کہ بھارتی جنگی جنون خطے کی سلامتی کے لئے خطرہ ہے، پاکستانی افواج وطن کی حفاظت کے لئے ہر ممکن جواب دینے کا حق محفوظ رکھتی ہیں۔ انہوں نے کہا کہ پورے ملک میں سکیورٹی ہائی الرٹ کردی گئی ہے اور وطن عزیز کے دفاع کیلئے پوری قوم متحد ہے۔ انہوں نے کہا کہ بھارتی وزیر اعظم مودی کی جانب سے پاگل پن کا مظاہرہ کیا گیا ہے،
دو ایٹمی طاقتوں کے درمیان لڑائی کا بھیانک انجام ہو سکتا ہے۔ ندیم افضل چن نے واضح کیا کہ پاکستان جنگ نہیں چاہتا مگر اپنی حفاظت کے لئے ہر حد تک جائیں گے، پاکستانی فضائیہ نے بھارتی طیاروں کو پاکستانی حدود میں داخل نہیں ہونے دیا، بھارتی حملے میں معصوم لوگوں کو شہید کیا گیا۔ انہوں نے بین الاقوامی برادری سے مطالبہ کیا کہ وہ بھارت کی جارحانہ پالیسیوں کا نوٹس لے، عالمی برادی خطے میں دیرپا امن کے قیام کے لئے اپنا کردار ادا کرے۔
Short Link: https://urdu.app.com.pk/urdu/?p=593921
