اسلام آباد۔28ستمبر (اے پی پی):ملک میں افراط زرکی شرح میں گزشتہ ہفتہ کے دوران ہفتہ واربنیادوں پر0.02 فیصدکی کمی جبکہ سالانہ بنیادوں پر37.33 فیصدکی نمو ریکارڈ کی گئی ہے۔
پاکستان بیوروبرائے شماریات کی جانب سے قیمتوں کے حساس اشاریہ (ایس پی آئی) بارے ہفتہ واررپورٹ کے مطابق 27 ستمبرکوختم ہونے والے ہفتہ میں صارفین کیلئے قیمتوں کاحساس اشاریہ 281.70 پوائنٹس ریکارڈ کیا گیا جوپیوستہ ہفتہ کے مقابلہ میں 0.02 فیصدکم ہے، پیوستہ ہفتہ میں صارفین کیلئے قیمتوں کاحساس اشاریہ 281.77 پوائنٹس ریکارڈ کیا گیا تھا۔گزشتہ ہفتہ کے دوران روزمرہ استعمال کے 14 ضروری اشیاء کی قیمتوں میں کمی اور23 کے قیمتوں میں استحکام رہا،
اس کے برعکس 14 ضروری اشیاء کی قیمتوں میں اضافہ ہوا۔ ہفتہ رفتہ میں ٹماٹرکی قیمت میں 7.09 فیصد، چکن 3.79 فیصد، کیلا 3.07 فیصد، چینی 1.56 فیصد، دال چنا0.80 فیصد، گڑ0.78 فیصد، آٹا0.68 فیصد، 5 لیٹرکوکنگ آئل 0.46 فیصد، سرسوں کاتیل 0.33 فیصد اورایل پی جی کی قیمت میں 0.42 فیصدکی کمی ہوئی، اس کے برعکس پیاز کی قیمت میں 21.42 فیصد، لہسن 4.44 فیصد، آلو0.99 فیصد، ماچس 0.87 فیصد، پکی بیف 0.83 فیصد، دہی 0.35 فیصد، انڈے 0.26 فیصد اوردال مونگ کی قیمت میں 0.25 فیصدکا اضافہ ہوا۔سب سے کم یعنی 17732 روپے ماہوارآمدنی رکھنے والے گروپ کیلئے قیمتوں کے حساس اشاریہ میں 0.03 فیصدکااضافہ ہوا، 17733 روپے سے لیکر22888 روپے، 22889 روپے سے لیکر29517 روپے،29518 روپے سے لیکر44175 روپے اوراس سے زیادہ ماہوارآمدنی رکھنے والے گروپوں کیلئے قیمتوں کے حساس اشاریہ میں بالترتیب 0.01 فیصد، 0.02 فیصد، 0.03 فیصد اور0.03 فیصدکی کمی ہوئی،
صارفین کیلئے قیمتوں کے حساس اشاریہ کاتعین ملک کے 17 شہروں کی 50 مارکیٹوں میں 51 ضروری اشیاء کی قیمتوں میں کمی بیشی کی بنیادپرکیاجاتاہے۔
Short Link: https://urdu.app.com.pk/urdu/?p=395818
