اسلام آباد۔29دسمبر (اے پی پی):وفاقی وزیربرائے توانائی حماد اظہر نے کہا ہے کہ ملک میں تیل و گیس کی تلاش اور پیداوار میں اضافہ حکومت کی اولین ترجیح ہے، بجلی کی پیداوار کے لیے مقامی وسائل کو بروئے کار لایا جائے گا۔
انہوں نے ان خیالات کا اظہار بدھ کو یہاں پاکستان میں سعودی عرب کے سفیر نواف بن سعید المالکی سے گفتگو کرتے ہوئے کیا جنہوں نے ان سے ملاقات کی۔ وزیر توانائی نے سعودی سفیر کو ملک بھر میں توانائی کے بنیادی ڈھانچے کی ترقی میں موجودہ حکومت کی طرف سے اٹھائے گئے اقدامات سے آگاہ کیا۔
انہوں نے سعودی سفیر کو توانائی کے شعبے میں حکومت کے اقدامات سے بھی آگاہ کیا جن کے تحت بجلی کی پیداوار کے لیے مقامی وسائل کو بروئے کار لانے کے لیے قابل تجدید توانائی کی پالیسی پر عمل کیا جا رہا ہے۔
انہوں نے کہا کہ حکومت تیل اور گیس کے شعبے میں تلاش اور پیداواری سرگرمیوں کو اولین ترجیح دیتی ہے جو ملک میں سرمایہ کاری کو راغب کریں گی۔ سعودی سفیر نے توانائی کے شعبے میں پاک سعودی منصوبوں کے لیے وفاقی وزیر توانائی اور ان کی ٹیم کی کوششوں کو سراہا۔ انہوں نے وفاقی وزیر کو فیوچر منرلز سمٹ میں بھی مدعو کیا جو 11 سے 13 جنوری 2022 کو ریاض میں منعقد ہوگی۔
