لاہور۔19مارچ (اے پی پی):گورنر پنجاب سردار سلیم حیدر خان نے کہا کہ پیپلز پارٹی عوامی جماعت ہے اور عوام میں رہنا پسند کرتی ہے۔ جب تک گورنر ہائوس میں موجود ہوں گورنر ہائوس کے دروازے لوگوں کے کھلے ہیں۔ انہوں نے کہا کہ ظلم پر تو معاشرہ قائم رہ سکتا ہے لیکن ناانصافی پر نہیں۔ ان خیالات کا اظہار انہوں نے بدھ کو یہاں گورنر ہائوس لاہور میں وکلا برادری کے اعزاز میں دیئے گئے افطار /ڈ نر کے موقع پر گفتگو کرتے ہوئے کیا ۔ اس موقع پر سینئر وکلا ظہیر چیمہ اور میاں شاہد سمیت وکلا ء برادری کی کثیر تعداد موجود تھی۔ گورنر پنجاب فردا فردا وکلا برادری کی میز پر جاکر ان سے ملے اور سلفیاں بھی بنوائیں۔
گورنر پنجاب نے کہا کہ ملک میں جمہوریت کے فروغ اور استخکام کیلئے وکلا برادری نے ہمیشہ بھر پور کردار ادا کیا ہے۔ انہوں نے کہا کہ معاشرے کی کامیابی کی انحصار صرف اور صرف انصاف پر مبنی ہے۔سلیم حیدر خان نے کہا کہ عام آدمی کو اس کی دہلیز پر انصاف فراہم کرنا ہمارے منشور کا بنیادی حصہ ہے۔انہوں نے کہا کہ عوام کو بر وقت انصاف کی فراہمی کو یقینی بنانے کے لئے پیپلز پارٹی پر عزم ہے ۔
انہوں نے کہا کہ بلاول بھٹو پنجاب کی عوام کے ساتھ جلد گورنر ہائوس میں افطاری پر موجود ہوں گے۔انہوں نے اس امید کا اظہار کیا کہ وکلا برادری بلاول بھٹو کو وزیر اعظم بنوانے میں ہراول دستے کا کردار ادا کرے گی۔انہوں نے کہا کہ گورنر ہائوس لاہور میں دی جانے والی افطار پارٹیاں ذاتی کاوشوں کا نتیجہ ہے ، اس میں سرکاری ایک روپیہ بھی نہیں لگایا جاتا۔
انہوں نے کہا کہ گورنر ہائوس میں افطاریوں کا اہتمام وزیر وں ، مشیروں کیلئے بلکہ عام آدمی کیلئے کیا جارہا ہے۔ گورنر پنجاب نے مزید کہا کہ دہشت گردی کے خلاف سکیورٹی فورسز کی قربانیاں ناقابل فراموش ہیں۔ انہوں نے کہا کہ ملکی سلامتی سے بڑا کوئی ایجنڈا نہیں ، دہشت گردی کے خلاف تمام لیڈران کو ایک پیج پر ہونا چاہئے۔
Short Link: https://urdu.app.com.pk/urdu/?p=574412
