اسلام آباد۔9مئی (اے پی پی):ملک میں ضروری اشیاء کی قیمتوں میں ہفتہ واربنیادوں پر0.24فیصداضافہ جبکہ سالانہ بنیادوں پر0.80فیصدکی کمی ریکارڈکی گئی ہے۔پاکستان بیوروآف سٹیٹسکس کی جانب سے قیمتوں کے حساس اشاریہ بارے ہفتہ وار رپورٹ کے مطابق 8مئی کوختم ہونے والے ہفتہ میں ملک میں روزمرہ استعمال کی 17اشیاء کی قیمتوں میں کمی اور25کی قیمتوں میں استحکام رہا، اس کے برعکس 9اشیاء کی قیمتوں میں اضافہ ہوا،ہفتہ رفتہ میں ٹماٹرکی قیمت میں 8.81فیصد،لہسن 5.05فیصد،آلو3.33فیصد،پیاز2.08فیصد،ایل پی جی 1.66فیصد،کیلا0.93فیصد،پیٹرول 0.83فیصد،ڈیزل 0.78فیصد،آٹا0.76فیصد،ایک کلوبناسپتی گھی 0.46فیصد اورسرسوں کے تیل کی قیمت میں 0.33فیصدکی کمی ہوئی،اس کے برعکس چکن کی قیمت میں 10.20فیصد،انڈے 7.36فیصد، چینی 1.93فیصد،بیف 1.50فیصد، دال ماش 0.31فیصد، پکی بیف 0.20فیصد،مٹن 0.15فیصد اورگڑکی قیت میں 0.11فیصداضافہ ہوا۔ سب سے کم یعنی 17732روپے ماہوارآمدنی رکھنے والے گروپ کیلئے قیمتوں کے حساس اشاریہ میں 0.10فیصداضافہ ہوا، 17733روپے سے لیکر22888روپے، 22889روپے سے لیکر29517روپے،29518روپے سے لیکر44175روپے اوراس سے زیادہ ماہوارآمدنی رکھنے والے گروپوں کیلئے قیمتوں کے حساس اشاریہ میں بالترتیب 0.18فیصد،0.20فیصد،0.26فیصد،اور0.26فیصدکااضافہ ہوا، صارفین کیلئے قیمتوں کے حساس اشاریہ کاتعین ملک کے 17بڑے شہروں کی 50مارکیٹوں میں 51ضروری اشیاء کی قیمتوں میں کمی بیشی کی بنیادپرکیا جاتاہے۔
Short Link: https://urdu.app.com.pk/urdu/?p=594848
