سیالکوٹ۔15اپریل (اے پی پی):ایڈیشنل ڈائریکٹر محکمہ لائیو سٹاک وڈیری ڈویلپمنٹ سیالکوٹ ڈاکٹر محمد وسیم نے کہا کہ ملک میں ڈیری فارمنگ اور لائیو سٹاک سیکٹر کی ترقی کے وسیع امکانات موجود ہیں جن سے استفادہ کرتے ہوئے بہترین جانور پالے جا سکتے ہیں ، حج کے دنوں میں سعودی عرب کو قربانی کے جانور برآمد کر کے قیمتی زر مبادلہ بھی کمایا جا سکتا ہے۔اے پی پی سے بات چیت کے دوران انہوں نے کہا کہ ملک کی لائیو سٹاک مارکیٹ میں تھوڑی سی بہتر منصوبہ بندی سے مویشی پال حضرات کی غربت کا خاتمہ کیا جا سکتا ہے۔
انہوں نے کہا کہ ہمارا ملک دنیا میں دودھ پیدا کرنے والا چوتھا بڑا ملک ہے لیکن ویلیو ایڈیشن نہ ہونے کی وجہ سے اس بھر پور پیداوار کو منافع بخش سرمایہ کاری میں منتقل کرنے اور اس کے معاشی ثمرات لائیو سٹاک فارمرز تک پہنچانے میں ابھی تک اہداف کے حوالے سے مکمل کامیابی نہیں ہو سکی۔
انہوں نے بتایاکہ سعودی عرب حج کے ایام میں آسٹریلیا، یمن،صومالیہ اور دیگر ممالک سے انتہائی مہنگے داموں قربانی کے حلال جانور درآمد کرتا ہے جبکہ پاکستان سے سعودی عرب قربانی کے جانوروں کی درآمد سعودی حکومت کو انتہائی سستی پڑتی ہے۔ انہوں نے ویلیو ایڈیشن کے ساتھ ساتھ جانوروں کی صحت اور خوراک کے مسائل کے حل کیلئے بھی نئی جدتیں اپنانے کی ضرورت پر زور دیا۔
Short Link: https://urdu.app.com.pk/urdu/?p=582139
