اسلام آباد ۔ 15 ستمبر (اے پی پی) سپیکر قومی اسمبلی اسد قیصر نے کہا ہے کہ ملک کی تعمیر و ترقی کے لئے جمہوری اداروں کا استحکام ناگزیر ہے، جمہوریت آزادیِ اظہار رائے سمیت تمام بنیادی حقوق کی فراہمی کی ضمانت دیتی ہے، امن کا قیام، انسانی حقوق کی فراہمی اور ملک کی ترقی جمہوریت سے وابستہ ہے۔ منگل کو عالمی یوم جمہوریت کے موقع پر اپنے پیغام میں انہوں نے کہا کہ جمہوری نظام کے ذریعے عوام ملک کے اقتصادی اور سیاسی نظام میں حصہ لے سکتے ہیں، جمہوریت میں ملک کی خاطر سیاسی اختلافات سے بالاتر ہو کر باہمی مشاورت سے فیصلے کئے جاتے ہیں، سیاسی جماعتوں کو قومی مفادات کی خاطر اپنی سیاسی وابستگیوں سے بالاتر ہو کر سوچنے کی ضرورت ہے، عوامی مسائل کو حل کرنے کے لئے عوامی نمائندوں کو اجتماعی سوچ اپنانا ہو گی، جمہوریت کا حسن ہے کہ ملک کو درپیش مسائل کا حل باہمی گفت و شنید اور بات چیت سے نکالا جائے۔ سپیکر قومی اسمبلی نے کہا کہ ہمارا مذہب بھی باہمی مشاورت کی ضرورت پر زور دیتا ہے، جمہوری اقدار کو فروغ دے کر ملک کو ایک ترقی یافتہ ممالک کی صف میں کھڑا کر سکتے ہیں، بھارت جو دنیا کی سب سے بڑی جمہوریت ہونے کا دعویدار ہے، نے اپنے ہی شہریوں کے حقوق صلب کر رکھے ہیں۔ گزشتہ 72سالوں سے بھارت کشمیر عوام کو ان کا حق خودارادیت دینے سے انکاری ہے جس کا وعدہ کشمیری عوام سے اقوام متحدہ کے سلامتی کونسل کی قراردادوں کے تحت کیا گیا تھا۔گزشتہ ایک سال سے زیادہ عرصے سے بھارت کی فاشسٹ حکومت نے مقبوضہ وادی میں گورنر راج نافذ کر رکھا ہے۔ بھارت نے گورنر راج کے ذریعے مقبوضہ کشمیر میں فوجی محاصرہ کر رکھا ہے۔ مقبوضہ جموں کشمیر کے عوام تمام جمہوری اور بنیادی حقوق محروم ہیں جمہوریت پسند اقوام کو کشمیری عوام کو ان کا حق خودارادیت دلانے میں کردار دار کرنے ضرورت ہے۔ سپیکر نے کہا کہ جمہوریت عام آدمی کو ملکی معاملات میں حصہ شرکت کا موقع فراہم کرتی ہے۔ ملک کی ترقی اور سلامتی جمہوریت کے مضبوطی اور تسلسل جمہوری اداروں کے استحکام سے منسلک ہے پاکستان میں جمہوریت کے تسلسل سے ملک مضبوط ہو رہا ہے، تمام سیاسی جماعتیں ملک کو درپیش چیلینجز سے نمٹنے کے لئے اپنا کردار ادا کر رہی ہیں، ماضی میں جمہوریت کا بار بار تسلسل ٹوٹنے کی وجہ ملکی ادارے کمزور ہوئے، جمہوریت کے تسلسل سے ادارے مضبوط ہوں گے اور ملک آگے بڑھے گا۔اقوام متحدہ کو کشمیری عوام کو ان کا بنیادی جمہوری حق دلانے کے لئے سلامتی کونسل کی قراردادوں پر عملدرآمد کرانے کی ضرورت ہے۔
