اسلام آباد۔14دسمبر (اے پی پی):ملک کے بالائی اور مغربی علاقوں میں مطلع ابرآلود رہنے کے علاوہ بعض مقامات پر با رش اور پہاڑوں پر برفباری کا امکان ہے جبکہ میدانی علاقے دھند /سموگ کی لپیٹ میں رہیں گے۔ محکمہ موسمیات کے مطابق جمعہ کے روز ملک کے بیشتر میدانی علاقوں میں موسم سرد اور خشک جبکہ بالائی علاقوں میں مطلع جزوی ابرآلودرہے گا۔
اس دوران بالائی خیبر پختونخوا، گلگت بلتستان اور بلوچستان کے شمال مغربی اضلاع میں مطلع ابرآلود رہنے کے علاوہ گرج چمک کے ساتھ بارش اور پہاڑوں پر برفباری کاامکان ہے۔ اس کے علاوہ پنجاب، خیبر پختونخوا کے میدانی علاقوں اور بالائی سندھ میں صبح اور رات کے اوقات میں دھند /سموگ چھائے رہنے جبکہ پنجاب کے بعض میدانی علاقوں میں شدید دھند کا امکان ہے۔گذشتہ 24 گھنٹوں کے دوران ملک کےبیشتر علاقوں میں موسم سرد اور خشک جبکہ شمالی علاقوں میں شدید سرد رہا۔
اس دوران ملک میں کم سے کم درجہ حرارت لہہ منفی 11،سکردو منفی 07،کالام منفی 06، گلگت، سرینگر منفی 05، گوپس منفی 04، قلات، راوالاکوٹ، دیر اور استور میں منفی 03 ڈگری سینٹی گریڈ ریکارڈ کیا گیا۔
Short Link: https://urdu.app.com.pk/urdu/?p=419976
