اسلام آباد۔3اپریل (اے پی پی):ملک کے بیشتر علاقوں میں آئندہ چوبیس گھنٹوں کے دوران موسم گرم وخشک رہنے تاہم بالائی خیبر پختونخواہ، گلگت بلتستان، کشمیر اور ملحقہ پہاڑی علاقوں میں مطلع جزوی ابرآلود رہنے کے علاوہ چند مقامات پر گرج چمک اور ہلکی بارش/بونداباندی کا امکان ہے۔
محکمہ موسمیات کے مطابق آئندہ دو تین روز کے دوران صوبہ سندھ اور جنوبی پنجاب میں دن کے درجہ حرارت معمول سے 2 سے 4 ڈگری سینٹی گریڈ زیادہ رہنے کی توقع ہے۔ رپورٹ کے مطابق گزشتہ 24 گھنٹوں کے دوران ملک کے بیشتر علاقوں میں موسم خشک جبکہ میدانی علاقوں میں گرم رہا جبکہ خیبر پختونخوا اور خطہ پوٹھوہار میں چند مقامات پر ہلکی بارش/بونداباندی ہوئی۔زیادہ سے زیادہ بارش چیراٹ میں 8، دیر (بالائی 0 5، زیریں ایک)، مالم جبہ 3، کالام، ڈیرہ اسماعیل خان، بنوں، پشاور (ائرپورٹ) اور تخت بائی میں بھی ایک ملی میٹر بارش ریکارڈ کی گئی۔
جمعرات کو ریکارڈ کئے گئے زیادہ سے زیادہ درجہ حرارت کی رپورٹ کے مطابق مٹھی میں درجہ حرارت 45، شہید بینظیر آباد 44، ٹنڈو جام اور چھور میں 43 ڈگری سینٹی گریڈ ریکارڈ کیا گیا ہے۔
Short Link: https://urdu.app.com.pk/urdu/?p=578178
