اسلام آباد۔26اپریل (اے پی پی):آئندہ چوبیس گھنٹوں کے دوران ملک کے بیشتر علاقوں میں موسم گرم اور خشک جبکہ وسطی/جنوبی علاقوں میں شدید گرم رہنے کا امکان ہے۔ محکمہ موسمیات کے مطابق گذشتہ 24 گھنٹوں کے دوران ملک کے بیشتر علاقوں میں موسم گرم اور خشک جبکہ جنوبی علاقوں میں شدید گرم رہا تا ہم خطہ پوٹھو ہار میں چند مقامات پر تیز ہواؤں اور گرچ چمک کے ساتھ ہلکی بارش ہوئی۔
ہفتہ کو ریکارڈ کئے گئے زیادہ سےزیادہ درجہ حرارت کی رپورٹ کے مطابق دادو ،سبی میں درجہ حرارت 48، لسبیلہ ، شہید بینظیر آباد ، خیر پور،تربت،لاڑکانہ،پڈعیدن اور جیکب آباد میں 46 ڈگری سینٹی گریڈ ریکارڈ کیا گیا۔
محکمہ موسمیات نے انتباہ جاری کرتے ہوئے کہا ہے کہ آئندہ پانچ روز کے دوران ملک کے جنوبی علاقوں(سندھ ،جنوبی پنجاب اور بلوچستان) میں دن کا درجہ حرارت معمول سے 5 سے 7 ڈگری سینٹی گریڈجبکہ ملک کے بالائی علاقوں(وسطی/بالائی پنجاب،اسلام آباد، خیبرپختونخوا، کشمیر، گلگت بلتستان)میں 4 سے 6 ڈگری سینٹی گریڈ زیادہ رہنے کا امکان ہے۔
Short Link: https://urdu.app.com.pk/urdu/?p=588273
