اسلام آباد۔9ستمبر (اے پی پی):اینٹی نارکوٹکس فورس (اے این ایف)نے 5 کارروائیوں کے دوران 10 کلوگرام سے زائد منشیات برآمد کر کے ایک خاتون اور غیر ملکی شہری گرفتار کر لیا۔
ترجمان اے این ایف کے مطابق راولپنڈی میں کوریئر آفس میں دو عدد پارسلز سے 60 گرام ویڈ برآمد کی گئی ہے۔دونوں پارسلز برطانیہ سے آزاد کشمیر کے لیے بک کروائے گئے تھے۔ اسی طرح گلبرگ لاہور میں واقع کوریئر آفس میں آسٹریلیا بھیجے جانے والے پارسل سے آئس برآمد کر لی گئی۔
انہوں نے کہا کہ ایک کلو 550 گرام آئس بچوں کی شیٹس، بیگز اور لہنگے میں چھپائی گئی تھی۔ پارسل بک کروانے والی لاہور کی رہائشی خاتون اور نائیجیرین باشندہ کو گرفتار کر لیا گیا ہے۔
لاہور ایئرپورٹ پر کراچی کیلئے بک کئے گئے پارسل سے ایک کلوگرام چرس برآمد کی گئی ہے۔مزید برآں خیبر کے علاقے زخہ خیل میں اسمگلنگ کے لئے چھپائی گئی 8 کلو 320 گرام چرس بھی برآمد کر لی گئی ہے۔ ترجمان اے این ایف نے کہا کہ گرفتار ملزمان کے خلاف انسدادِ منشیات ایکٹ کے تحت مقدمہ درج کر کے مذید تحقیقات کا آغاز کر دیا گیا ہے۔
Short Link: https://urdu.app.com.pk/urdu/?p=388380
