لاہور۔11اگست (اے پی پی):منہاج یوتھ لیگ لاہور کے زیر اہتمام 12 اگست بروز منگل سے مرکزی سیکرٹریٹ ماڈل ٹائون میں پودے لگا کر ملک گیر شجر کاری مہم کا آغاز کیا جائے گا۔شجر کاری مہم آج 12 اگست سے 5ستمبر تک جاری رہے گی۔12اگست کو یوم آزادی کے حوالے سے پرچم کشائی اور نوجوانوں کے عالمی دن کے موقع پرنوجوان پاکستان کا مستقبل کے عنوان سے تقریب بھی منعقد کی جائے گی جس میں ملک بھر کی یوتھ تنظیموں کے نمائندے شرکت کریں گے۔
مرکزی صدر منہاج یوتھ لیگ رانا وحید شہزاد نے اجلاس سے خطاب کرتے ہوئے کہاکہ منہاج یوتھ لیگ کے زیر اہتمام ماحولیاتی توازن کو برقرار رکھنے میں درختوں کی اہمیت و شجر کاری مہم کے سلسلے میں ملک کے تمام اضلاع میں تقاریب بھی منعقد کی جائیں گی۔سیمینارز،واکس کے ذریعے عوام کو شجر کاری مہم میں شامل کیا جائے گا ۔انہوں نے مزید کہاکہ شجر کاری سے نہ صرف ماحولیاتی توازن برقرار رہتا ہے بلکہ یہ عمل صدقہ جاریہ بھی ہے۔انسانی فلاح و بہبود کیلئے پاکستان میں زیادہ سے زیادہ درخت لگانے اور جنگلات بڑھانے ہوں گے۔ شجر کاری مہم کے تحت ملک بھر میں ایک لاکھ پودے لگائے جائیں گے، درخت لگانا قومی فریضہ ہے ہر شہری کا کردار اہم ہو گا ۔
