اسلام آباد ۔ 3 جون(اے پی پی) ایسوسی ایٹڈ پریس آف پاکستان (اے پی پی) کے منیجنگ ڈائریکٹر مسعود ملک نے ترکی کے ساتھ میڈیا کے شعبہ میں تعاون میں اضافہ کےلئے عملی اقدامات کی ضرورت پر زور دیا ہے۔ جمعہ کو یہاں ترک نیوز ایجنسی اناطولو کے ریجنل ڈائریکٹر یلماز یامن جو ترک نیوز ایجنسی کے نئے علاقائی دفتر کا افتتاح کرنے کے لئے یہاں آئے ہیں،کے ساتھ بات چیت کرتے ہوئے انہوں نے کہا کہ ترک نیوز ایجنسی کے نئے ریجنل آفس سے دونوں برادر ممالک کے درمیان میڈیا کے شعبہ میں دوطرفہ تعاون بڑھانے میں مدد ملے گی۔ منیجنگ ڈائریکٹر مسعود ملک نے دونوں ممالک کے درمیان دوطرفہ تعلقات کو مزید مضبوط بنانے کے لئے اے پی پی کے مکمل تعاون کا یقین دلایا۔ اناطولو نیوز ایجنسی کے ریجنل ڈائریکٹر یلماز یامن نے اے پی پی اور ترک نیوز ایجنسی کے درمیان خبروں کے تبادلے کا جائزہ لیا اور کہا کہ ترک نیوز ایجنسی دونوں ممالک کے درمیان تعاون کو وسعت دینے میں دلچسپی رکھتی ہے۔
