اسلام آباد۔18اکتوبر (اے پی پی):قومی احتساب بیورو (نیب) کے چئیرمن جسٹس (ر)جاوید اقبال نے کہا ہے کہ نیب منی لانڈرنگ،میگا کرپشن ا ور وائٹ کالر کرائمز کیسز کو شفافیت اور میرٹ پرنمٹانے کیلئے پر عزم ہیں، مفروروں اور اشتہاریوں کی گرفتاری کیلئے تمام وسائل بروئے کار لائے جا رہے ہیں۔اتوار کو انہوں نے کہاکہ معزز احتساب عدالتوں میں 1230بدعنوانی کے ریفرنسز کی جلد سماعت کے لئے پراسیکیوشن ڈویژن کو درخواستیں دائر کرنے کی ہدایت کی گئی ہے۔جنہوں نے کروڑوں اور اربوں روپے کی کرپشن کی ہے۔ان کے خلاف قانون اپنا راستہ خود بنا ئے گا۔ چئیرمن نیب جسٹس جاوید اقبال نے کہا کہ ملک سے بد عنوانی کا خاتمہ نیب کی اولین ترجیح ہے۔ بدعنوانی ایک کینسر ہے۔جس کا واحد حل سرجری ہے۔انہوں نے کہا کہ میگا کرپشن کے وائٹ کالر کرائمز کو قانون کے مطابق نمٹانے کے لئے نیب نے اپنے پراسیکیوشن اور آپریشن ڈویڑن کوتمام ضروری ہدایات جاری کر دی ہیں۔اس کے علاوہ نیب نے معزز احتساب عدالتوں میں 1230بدعنوانی کے ریفرنس دائر کررکھے ہیں۔ان کیسز کی جلد سماعت کے لئے متعلقہ احتساب عدالتوں میں درخواستیں دائر کرنے کا فیصلہ کیا ہے۔تاکہ قوم کے تقریباً 943ارب روپے جو لوٹے گئے ہیں۔ان مقدمات کا قانون کے مطابق فیصلہ ہو اور بدعنوان عناصر کو قانون کے مطابق سزا دلوائی جا سکے۔انہوں نے کہا کہ منی لانڈرنگ اور بدعنوانی کے دیگر مقدمات کی تحقیقات میرٹ اور شفافیت پر جاری ہیں۔مزید برآں ہاوسنگ سوسائٹیوں،مضاربہ سکینڈلز کے مقدمات کی تحقیقات کے علاوہ اشتہاری اور مفرور ملزمان کی گرفتاری کیلئے تمام وسائل بروئے کار لائے جا رہے ہیں۔
