مظفر آباد۔ 08 مئی (اے پی پی):صدر آزاد جموں وکشمیر بیرسٹر سلطان محمود چوہدری نے کہا ہے کہ موجودہ جنگی صورتحال میں آزاد کشمیرکے عوام اور تمام سیاسی قیادت متحد ہے۔ہم سب اکٹھے ہو کر اپنی بہادر ا فواج کے ہمراہ بھارت کے جنگی جنون کا منہ توڑ جواب دیں گے۔
بھارت کی طرف سے رات کی تاریکی میں پاکستان پر حملے کے فوراً بعد پاک فوج نے بھارت کے پانچ جنگی جہاز مار گرائے اور مودی سرکار کے جنگی جنون کو خاک میں ملا دیا جس پر ہم اپنی پاک افواج کو سلام پیش کرتے ہیں۔ان خیالات کا اظہار انھوں نے سابق وزیر اعظم آزادکشمیر راجہ محمد فاروق حیدر خان، سپیکر آزاد جموں وکشمیر قانون ساز اسمبلی چوہدری لطیف اکبر اور دیگر وفودسے گفتگو کرتے ہوئے کیا۔
انھوں نے کہا کہ ہم یقین دلاتے ہیں کہ آزادکشمیر کی تمام سیاسی قیادت اور عوام بھارت کی جارحیت کا مل کر مقابلہ کریں گے۔بھارت نے جیسے رات کی تاریکی میں ننگی جارحیت کا مظاہرہ کرتے ہوئے معصوم شہریوں پر بمباری کی ہے جس کے نتیجے میں بے گناہ شہری شہید ہوئے ہیں۔ لہذا یسے وقت میں ہم سب کو مل کر بحیثیت قوم اپنی پاک فوج کے شانہ بشانہ کھڑے ہو کر بھارت کے ان ناپاک عزائم کا منہ توڑ جواب دیں گے۔
Short Link: https://urdu.app.com.pk/urdu/?p=594445
