اسلام آباد۔18جولائی (اے پی پی):وفاقی وزیر ماحولیاتی تبدیلی شیری رحمان نے کہا ہے کہ پاکستان میں موسمیاتی لچک کو بڑھانے کے لیے اطالوی وفد کی میزبانی کر رہے ہیں۔ وفاقی وزیر برائے موسمیاتی تبدیلی شیری رحمان نے حال ہی میں اٹلی سے آنے والے وفد کا وزارت موسمیاتی تبدیلی اور ماحولیاتی رابطہ میں خیر مقدم کیا۔ وفد میں میلان یونیورسٹی اور اطالوی ایسوسی ایشن Ev-K2-CNR کے نمائندے شامل تھے۔ وفد کی قیادت سفیر اینڈریاس فیرریز کر رہے تھے۔
اس کے علاوہ حکومت گلگت بلتستان اور یو این ڈی پی کے حکام بھی ملاقات میں موجود تھے۔ وزارت موسمیاتی تبدیلی اور ماحولیات کوآرڈینیشن کی جانب سے منگل کو یہاں جاری پریس ریلیز کے مطابق وفاقی وزیر شیری رحمان نے خیبرپختونخوا اور گلگت بلتستان کے صوبوں میں اطالوی حکومت کے جاری تعاون پر اظہار تشکر کیا۔ انہوں نے پاکستانی پہاڑوں میں EvK2CNR کی 35 سالہ شاندار موجودگی کا اعتراف کیا۔ وفاقی وزیر نے خاص طور پر ‘گلیشیئرز اینڈ اسٹوڈنٹس’ پروجیکٹ کی تعریف بھی کی۔
جس کو اطالوی ایجنسی فار ڈیولپمنٹ کوآپریشن (AIC) کی طرف سے فنڈز فراہم کیے گئے ہیں جو UNDP پاکستان کے ذریعے نافذ کیا گیا ہے اور EvK2CNR کے ذریعے عمل میں لایا گیا ہے۔ اس اقدام کا مقصد کئی اہم مقاصد کو پورا کرنا ہے۔ جن میں 8 آٹومیٹک ویدر سسٹمز (AWS) کا قیام، پاکستان کے 7,200 گلیشیئرز کی انوینٹری کی تخلیق اور قراقرم انٹرنیشنل یونیورسٹی اور یونیورسٹی آف بلتستان میں طلباء کی صلاحیت سازی اور تربیت کے مواقع کی فراہمی شامل ہے اور اس کے ساتھ ساتھ گلگت بلتستان انوائرمینٹل پروٹیکشن ایجنسی کے عملے کی تربیت بھی پروگرام کا حصہ ہے۔
وفد سے ملاقات کے موقع پر اپنے ابتدائی کلمات میں وفاقی وزیر شیری رحمان نے موسمیاتی تبدیلی کی صورتحال کی فوری ضرورت پر زور دیتے ہوئے کہاکہ پاکستان قطبی خطوں سے باہر گلیشیئرز کی سب سے بڑی تعداد پر فخر کرتا ہے جبکہ ان انمول وسائل کو موسمیاتی تبدیلیوں کی وجہ سے اہم خطرات کا سامنا ہے۔ انہوں نے کہا کہ ضرورت اس امر کی ہے کہ ہماری یونیورسٹیاں موسمیاتی لچک اور انتظام کے حوالے سے اپنے طلباء کے درمیان ایک جامع سوجھ بوجھ پیدا کرنے کے لیے قریبی تعاون کریں۔
انہوں نے کہا یہ پروجیکٹ بہت اہمیت کا حامل ہے کیونکہ یہ ہمیں اپنے گلیشیئرز پر موسمیاتی تناؤ کی وجہ سے ہونے والی تبدیلیوں کو مؤثر طریقے سے نوٹ کرنے اور ان کی نگرانی کرنے کے قابل بنائے گا۔ انہوں نے مزید کہا کہ برف پگھلنے میں خطرناک حد تک اضافہ ہو رہا ہے جس کے نتیجہ میں گزشتہ سال کے دوران پاکستان میں گلیشیل لیک آؤٹ برسٹ فلڈ (GLOF) کے واقعات میں حیران کن طور پر 300 فیصد اضافہ ہوا ہے۔ اس موقع پر سفیر انڈریس فیرریز نے دونوں ممالک کے درمیان پائیدار دوستی اور غیر معمولی تعاون پر اظہار تشکر کیا۔ انہوں نے اس حقیقت پر زور دیا کہ اٹلی بھی موسمیاتی تبدیلی کے تباہ کن نتائج سے بہت زیادہ متاثر ہے۔
انہوں نے گزشتہ سال پاکستان میں رونما ہونے والے المناک واقعات اور خاص طور پر تباہ کن سیلاب، جس سے حیرت انگیز طور پر 33 ملین افراد کو متاثر کیا تھا، اس کے حوالے سے اپنی دلی ہمدردی کا اظہار کیا۔ انہوں نے ‘گلیشیئرز اینڈ اسٹوڈنٹس’ پروجیکٹ کی اہمیت پر زور دیتے ہوئے کہا کہ منصوبہ گلیشیئرز کی جامع نقشہ سازی میں سہولت فراہم کرے گا اور ان انمول وسائل کی مؤثر طریقے سے حفاظت کے لیے مکمل تفصیلات کی فراہمی میں بھی معاون ثابت ہو گا۔
گلگت بلتستان حکومت کے حکام نے وفاقی وزیر شیری رحمان کو خطے کے قدرتی ماحول کے تحفظ کے لیے جاری کوششوں کے بارے میں ایک جامع بریفنگ دی۔ انہوں نے موسمیاتی لچک کو بڑھانے کے لیے اطالوی حکومت کے تعاون سے کیے گئے مختلف اقدامات کے بارے میں بھی تفصیلات کا اشتراک کیا۔ وفاقی وزیر نے گلگت بلتستان حکومت کی نمایاں کاوشوں کو سراہا۔ انہوں نے وزیر اعظم ذوالفقار علی بھٹو کے بصیرت افروز نقطہ نظر پر زور دیا۔ جنہوں نے 1974 میں خطہ میں ماحولیاتی تحفظ کے عزم کے طور پر خنجراب نیشنل پارک کو ایک محفوظ علاقہ قرار دیا تھا۔
قابل ذکر بات یہ ہے کہ خنجراب نیشنل پارک نہ صرف پاکستان کا سب سے اونچائی والا قومی پارک ہے بلکہ سب سے بڑے پارکوں میں سے بھی ایک ہے۔ میلان یونیورسٹی کے وفد نے واٹر فار ڈویلپمنٹ (W4D) کے نام سے مشہور منصوبے کی تجویز بھی پیش کی۔ یہ تین سالہ منصوبہ جو ستمبر 2023 میں شروع ہو گا۔ اس کا مقصد پہاڑی علاقوں میں پائیدار ترقی اور موافقت کی پالیسیوں کی حمایت کرنا ہے۔
یہ منصوبہ مستعد نگرانی کی سرگرمیوں کے ذریعے آبی وسائل کے انتظام، زمین کی تزئین کی حفاظت، زرعی نظام اور ماحولیاتی خطرے کو کم کرنے پر توجہ مرکوز کرے گا۔ مزید برآں، یہ سیاحت کی ذمہ دارانہ اور پائیدار ترقی پر زور دے گا۔ اس کے علاوہ یہ منصوبہ ماحولیاتی، زرعی اور ثقافتی ورثے کے تحفظ کو یقینی بنانے کے ساتھ ساتھ ماحولیاتی نظام کی خدمات کو بھی بہتر بنائے گا۔
مزید یہ کہ یہ منصوبہ پائیدار زمین کے انتظام میں مقامی حکومتوں کی صلاحیت کو مضبوط کرنے کی کوششوں کو بھی تقویت دیتا ہے۔ واضح رہے کہ منصوبہ پر عمل درآمد حکومت گلگت بلتستان اور دیگر مقامی شراکت داروں کے قریبی تعاون سے کیا جائے گا۔
