اسلام آباد۔22جنوری (اے پی پی):وزیراعظم کی معاون برائے موسمیاتی تبدیلی رومینہ خورشید عالم نے موسمیاتی پائیداری کے اہداف کے حصول کےلئے حکومتی اداروں اور خوردنی تیل کی صنعت کے درمیان مضبوط تعاون کی ضرورت پر زور دیتے ہوئے کہا ہے کہ صنعتیں ہماری قومی معیشت کے لئے اہم ہیں لیکن انہیں اپنے ماحولیاتی اثرات کو کم کرنے کی ذمہ داری بھی اٹھانا ہو گی ۔انہوں نے یہ بات بدھ کوخوردنی تیل کی صنعت کے چھ رکنی وفد سے ملاقات کے دوران کہی۔ وفد کی قیادت سی ٹریڈ گروپ کے سی ای او، عمر نجیب بلگم والا کر رہے تھے۔ملاقات میں پارلیمانی سیکرٹری رانا احمد عتیق انور، وفاقی سیکرٹری عائشہ حمیرہ موریانی، وزارت موسمیاتی تبدیلی کے سینئر حکام اور قومی اسمبلی کے رکن ریاض الحق نے شرکت کی۔
رومینہ خورشید عالم نے پائیدار سورسنگ، توانائی کی افادیت، فضلہ کے انتظام اور سرکولر معیشت کے طریقوں کو ایک صاف ماحول کو فروغ دینے کے لئے اقدامات اٹھانے پر زور دیتے ہوئے کہا کہ یہ صنعتیں ہماری قومی معیشت کے لئے اہم ہیں لیکن انہیں اپنے ماحولیاتی اثرات کو کم کرنے کی ذمہ داری بھی اٹھانا ہو گی تاکہ وہ حکومت کے موسمیاتی مقاصد سے ہم آہنگ ہوں۔ انہوں نے کہا کہ ماحولیاتی دوستانہ طریقوں کو اپنانا اس بات کو یقینی بنانے کے لئے ضروری ہے کہ ترقی ماحول کی قیمت پر نہ ہو۔اس موقع پرسی ٹریڈ گروپ کے سی ای او عمر نجیب بلگم والا نے بتایا کہ خوردنی تیل کی صنعت کو کئی چیلنجز کا سامنا ہے جن میں شپمنٹ کے مسائل اور تیل کے بیج درآمد کرنے میں تکنیکی رکاوٹیں شامل ہیں۔انہوں نے وفد کو حکومت کی طرف سے صنعت کو سہولت فراہم کرنے کا یقین دلایا اور صنعتکاروں سے پائیدار پیداوار کے متبادل تلاش کرنے کی اپیل کی۔
انہوں نے کہا کہ پاکستان کی موسمیاتی حکمت عملی کو خوراک کی پیداوار کے ماحولیاتی اثرات کو حل کرنا ہوگا اور خام مال کی ذمہ دار سورسنگ، صاف پیداوار کے طریقوں اور فضلہ کم کرنے کی ضرورت پر زور دیا۔رومینہ خورشید عالم نے نشاندہی کی کہ یہ شعبہ ٹھوس، مائع اور پیکیجنگ فضلہ کی بڑی مقدار پیدا کرتا ہے۔ انہوں نے کہا کہ فضلہ کے مناسب انتظام اور فضلہ سے قیمت پیدا کرنے کی حکمت عملیوں کو لاگو کرنا ان مسائل کو کم کر سکتا ہے۔ انہوں نےکہا کہ خوردنی تیل کی صنعت کے مخصوص گرین ہاؤس گیس کے اخراجات پر تحقیق کی ضرورت ہے جس کے لئے ماحولیاتی تنظیمیں ایسے مطالعات کریں جو ملک کے موسمیاتی اہداف کی حمایت کے لئے مزید درست ڈیٹا فراہم کریں۔
اس موقع پروزیراعظم کے موسمیاتی تبدیلی کے پارلیمانی سیکرٹری رانا احمد عتیق انور نے خوردنی تیل کی صنعت کی مدد کی اہمیت پر زور دیا تاکہ اقتصادی ترقی اور پائیداری دونوں میں اضافہ ہو سکے۔ انہوں نے کہا کہ ہم صنعت کو سہولت فراہم کرنے کے لئے کام کر رہے ہیں ۔انہوں نے کہا کہ مقامی پیداوار کو بڑھانے اور ملک کی خوردنی تیل کی ضروریات کو پورا کرنے اور درکار درآمدات کو کم کرنے کے لئے کوششیں کی جا رہی ہیں جو اس وقت پاکستان کی خوردنی تیل کی کھپت کا 90 فیصد ہے۔
وزارت موسمیاتی تبدیلی کی وفاقی سیکرٹری عائشہ حمیرا موریانی نے خوردنی تیل کے شعبے کی ترقی کی حمایت کے لئے حکومت کے عزم کا اعادہ کیا اور اس صنعت کی معیشت میں نمایاں شراکت داری کی صلاحیت اور ماحولیاتی چیلنجز کا بھی ذکر کیا۔ عائشہ موریانی نے تمام سٹیک ہولڈرز پر زور دیا کہ وہ صلاحیت سازی پر توجہ مرکوز کریں جو اس شعبے میں پیداواری صلاحیت اور پائیداری کو بہتر بنانے کے لیے ضروری ہے۔
