موسم بہار شجر کاری مہم کے دوران آٹھ لاکھ سے زائد پودے لگائے جائیں گے، ڈپٹی کمشنر پشاور

پشاور۔ 22 فروری (اے پی پی):ڈپٹی کمشنر پشاور سرمد سلیم اکرم کی سربراہی میں ناردرن بائی پاس پر موسم بہار شجر کاری مہم کے تحت 1540 سے زائد پودے لگائے گئے۔ اس موقع پر اسسٹنٹ کمشنر (حسن خیل) شہروز مفتی، اسسٹنٹ کمشنر (یوٹی) علینہ، سب ڈویژنل فارسٹ آفیسر عبدالستار سمیت محکمہ جنگلات کے حکام، ریونیو اہلکار، اساتذہ کرام، طلباء ، عوامی نمائندگان اور مقامی افراد کی کثیر تعداد موجود تھی، جنہوں نے شجر کاری مہم میں بھرپور حصہ لیا۔

ڈپٹی کمشنر پشاور نے شجر کاری کی اہمیت پر روشنی ڈالتے ہوئے کہا کہ پشاور کو سرسبز بنانے کے لیے اجتماعی کاوشوں کی ضرورت ہے۔ انہوں نے کہا کہ موسم بہار شجر کاری مہم کے دوران پشاور بھر میں آٹھ لاکھ سے زائد پودے لگائے جائیں گے تاکہ ماحولیاتی آلودگی کے خاتمے اور شہر کو مزید خوبصورت بنانے میں مدد مل سکے۔ انہوں نے مزید کہا کہ درخت نہ صرف ماحولیاتی بہتری میں اہم کردار ادا کرتے ہیں بلکہ آلودگی کم کرنے، آکسیجن فراہم کرنے اور درجہ حرارت کو متوازن رکھنے میں بھی مددگار ثابت ہوتے ہیں۔

ڈپٹی کمشنر پشاور نے اس موقع پر طلباء اور مقامی افراد سے بھی بات چیت کی اور انہیں شجر کاری کی اہمیت اور ماحول کے تحفظ کے حوالے سے آگاہ کیا۔

Short Link: https://urdu.app.com.pk/urdu/?p=564900