فیصل آباد۔ 23 دسمبر (اے پی پی):موسم سرما کے دوران سبزیوں کی فصل پر روئیں دار پھپھوند کے حملہ کے خدشہ کے پیش نظر کاشتکاروں کو حفاظتی اقدامات کی ہدایت کی گئی ہے ۔ایوب زرعی تحقیقاتی ادارہ فیصل آباد کے شعبہ امراض نباتات کے ماہرین نے کہا کہ چونکہ مذکورہ حملہ سے پتوں کی نچلی سطح پر نم دار دھبے تیزی سے بڑھنے کے باعث پتے مرجھا کر سوکھ جاتے ہیں اور فصل کو بھی شدید نقصان پہنچتاہے لہٰذا کاشتکار اس ضمن میں کسی کوتاہی کامظاہرہ نہ کریں اور ماہرین زراعت کی مشاورت کے مطابق تدارکی اقدامات یقینی بنائیں۔ ماہرین نے بتایا کہ سردیوں میں کاشتہ سبزیوں ٹماٹر، کھیرا، چپن کدو اور مٹرپرروئیں دار پھپھوند کا حملہ ہوسکتا ہے جس سے پتوں کی نچلی سطح پر نم دار دھبے تیزی سے بڑھتے اور پتے مرجھا کر سوکھ جاتے ہیں۔
انہوں نے بتایاکہ15سے20ڈگری سینٹی گریڈ درجہ حرارت اور 80فیصد سے زیادہ نمی یا ابرآلو د موسم میں اس بیماری کا حملہ تیزی سے ہوتا ہے جس سے پودے اور پھل بھی گل سڑ جاتا ہے۔انہوں نے بتایاکہ سفوفی پھپھوندبھی کھیرا، چپن کدو اور مٹر پر حملہ آور ہو کر ان کی پیداوار میں کمی کا باعث بنتی ہے جبکہ اس بیماری کے حملہ کی صورت میں ان فصلوں کے نچلے پتوں پر گول سفید دھبے نمودار اور آہستہ آہستہ یہ دھبے تنوں اور پتوں کی بالائی سطح پر بھی ظاہر ہوتے ہیں۔
انہوں نے کہاکہ ان دھبوں میں سفید پھپھوند پیدا ہوتی ہے جو جم اور متاثرہ بھورے پتے مرجھا کر مرجاتے ہیں۔ انہوں نے بتایاکہ سفید پھپھوند پھلوں پر بھی حملہ آور ہوتی ہے جس سے پھلوں کی بڑھوتری رک جاتی ہے اور ذائقہ خراب ہوجاتا ہے۔انہوں نے بتایاکہ پچھیتا جھلساؤ کی بیماری سے ٹماٹر پھول گوبھی، سرخ مرچ اور شملہ مرچ متاثر ہوتی ہیں جس سے پتوں، تنے، پھلوں اور ڈنڈیوں پر نمدار بھورے اور ارغوانی دھبے پیدا ہوتے ہیں۔
انہوں نے بتایاکہ پتوں کے زیر یں سطح پر پھپھوند کا مواد پیداہوتا ہے اور زیادہ نمی کے دوران یہ بیماری وباء کی شکل اختیار کرلیتی ہے۔انہوں نے کہاکہ کاشتکار ان بیماریوں کے تدارک کے لیے بیج کو مناسب پھپھوند کش زہر لگالیں اور حفاظتی پھپھوند کش زہر پانی میں ملا کر دس دن کے وقفہ سے سپرے کریں نیزبرداشت کے بعد فصلات کے بچے کھچے حصوں کو جلادیں تاکہ پھپھوند دیگر پودوں کو نقصان نہ پہنچا سکے۔
Short Link: https://urdu.app.com.pk/urdu/?p=538820
