فیصل آباد۔ 10 اکتوبر (اے پی پی):ڈپٹی ڈائریکٹر محکمہ زراعت توسیع فیصل آباد چوہدری خالد محمود نے کہا کہ مونگ پھلی کی برداشت کے لیے موزوں وقت کاانتخاب بہت اہمیت کا حامل ہے کیونکہ اگیتی برداشت کی صورت میں کچی پھلیوں کی زیادہ تعداد پیداوار میں کمی کاباعث بنتی ہے۔
انہوں نے کہا کہ مونگ پھلی کی کم پیداوار کی اہم وجہ برداشت کے سلسلہ میں زرعی ماہرین کی سفارشات پر پوری طرح عملدرآمد نہ کرناہے۔ انہوں نے کہا کہ مونگ پھلی کی فصل کی بھر پور پیداوار کے لیے برداشت ایک ایسا عمل ہے جو معیار پر بھی اثر انداز ہوتاہے۔
انہوں نے کہاکہ مونگ پھلی کی برداشت میں تاخیر کی جائے تو پھلیوں کارنگ سیاہ ہو جاتاہے جو پیداوار کے ضائع ہونے کا موجب بنتاہے۔انہوں نے بتایاکہ مونگ پھلی کی جدید اقسام 6ماہ میں پک کر تیار ہو جاتی ہیں اور اس کی برداشت کامناسب وقت نومبر کامہینہ ہوتاہے۔
