لاہور۔23جون (اے پی پی):پی ڈی ایم اے پنجاب نے مون سون بارشوں بارے الرٹ جاری کردیا ہے جبکہ رواں سال مون سون بارشیں 35فیصد زیادہ ہونے کے امکانات ہیں۔ ترجمان کے مطابق صوبہ بھر کی انتظامیہ کو مون سون بارشوں سے متعلق مراسلہ جاری کردیا گیا ہے جس میں کہا گیا ہے کہ رواں سال مون سون بارشیں 35فیصد تک زیادہ ہونے کے خطرات ہیں جبکہ یکم جولائی سے پنجاب میں مون سون بارشوں کا سلسلہ شروع ہونے کی پیشگوئی کی گئی ہے، جولائی کے پہلے ہفتے میں 15سے 50ملی میٹر بارش، دوسرے ہفتے میں 25سے 35ملی میٹر ،تیسرے ہفتے میں بالائی اور جنوبی پنجاب میں 15سے 25ملی میٹر جبکہ چوتھے ہفتے میں 50سے 70ملی میٹر بارشوں کی توقع ہے۔
ترجمان کے مطابق جولائی میں بالائی، وسطی اور جنوبی پنجاب میں گرج چمک کے ساتھ تیز بارشیں متوقع ہیں جبکہ مون سون بارشوں سے اربن فلڈنگ اور جنوبی پنجاب میں ہل ٹورنٹس کا بھی خطرہ ہے۔ ڈی جی پی ڈی ایم اے علی عرفان کاٹھیا نے کہا ہے کہ وزیر اعلی پنجاب مریم نواز شریف کی ہدایات کے پیش نظر اس سلسلہ میں تمام متعلقہ محکموں کو الرٹ کر دیا گیا ہے ۔
انہوں نے ضلعی انتظامیہ کو ہدایت کی کہ مون سون بارشوں سے قبل تمام تر حفاظتی اقدامات کو یقینی بنا یا جائے جبکہ ندی ،نالوں کی صفائی اور نکاسی آب کے انتظامات جلد از جلد مکمل کئے جائیں۔ڈی جی نے کہا کہ باہمی تعاون اور قبل از وقت انتظامات سے قدرتی آفات کے نقصانات سے بچا جا سکتا ہے،شہریوں کے جان و مال کا تحفظ اولین ترجیح ہے اور اس سلسلہ میں کوتاہی یا غیرذمہ داری برداشت نہیں کی جائے گی ۔
Short Link: https://urdu.app.com.pk/urdu/?p=478225
