لاہور۔12اگست (اے پی پی):پی ڈی ایم اے پنجاب نے مون سون بارشوں کے ساتویں اسپیل کا الرٹ جاری کر دیا،کل13 سے 15 اگست کے دوران پنجاب کے بیشتر اضلاع میں شدید مون سون بارشوں کی پیشگوئی ہے۔ ترجمان پی ڈی ایم اے کے مطابق صوبائی دارالحکومت لاہور، گوجرانوالہ ،راولپنڈی اور ڈیرہ غازی خان میں شدید بارشوں کا امکان ہے،جس کے با عث لاہور ،راولپنڈی، گوجرانوالہ اور سیالکوٹ میں اربن فلڈنگ کا خدشہ ہے۔
اسی طرح دریائے سندھ، چناب،ستلج، جہلم اور راوی کے بالائی حصوں میں بھی شدید موسلادھار بارشوں کی پیشگوئی کی گئی ہے،جس کے باعث بڑے دریائوں سے ملحقہ ندی نالوں میں فلیش فلڈنگ کا خطرہ ہے ۔ڈی جی پی ڈی ایم اے عرفان علی کاٹھیا کی جا نب سے وزیر اعلی پنجاب کی ہدایات کے پیش نظر صوبہ بھر کے کمشنرز و ڈپٹی کمشنرز سمیت سول ڈیفنس، ریسکیو اور متعلقہ اداروں کو پیشگی انتظامات مکمل کرنے کی ہدایت کر دی گئی ہے۔
ڈی جی پی ڈی ایم اے نے کہا کہ ایمرجنسی کنٹرول رومز میں سٹاف اور ریسکیو1122 کی ڈیزاسٹر رسپانس ٹیموں کو ہائی الرٹ رکھا جائے۔انہوں نے کہا کہ عوام جاری کردہ احتیاطی تدابیر پر عمل کریں،اربن و فلیش فلڈنگ کی صورت میں محفوظ مقامات پر رہیں،گاڑی ہرگز بہتے ہوئے پانی سے کراس نہ کریں۔
انہوں نے کہا کہ شدید بارشوں کے باعث مری و گلیات میں لینڈ سلائیڈنگ کا خطرہ ہے،مسافر اور سیاح موسمی صورتحال کے پیش نظر محتاط رہیں اور غیر ضروری سفر سے گریز کریں۔انہوں نے مز ید کہاکہ بارشوں کے باعث کچے مکانات،مخدوش عمارتوں کو نقصان کا خدشہ ظاہر کیا گیا ہے،کسی بھی ایمرجنسی کی صورت میں پی ڈی ایم اے کی ہیلپ لائن 1129 پر رابطہ کریں ۔