اسلام آباد۔21جنوری (اے پی پی):پاکستان فرنیچر کونسل (پی ایف سی)کے چیف ایگزیکٹو آفیسر میاں کاشف اشفاق نے پی ایف سی کے پلیٹ فارم سے پاکستانی فرنیچر کی انٹرنیشنل مارکیٹ میں پروموشن کے لیے سالانہ منصوبہ پیش کر دیا ہے۔
اتوار کو بورڈ آف ڈائریکٹرز کے اجلاس کی صدارت کرتے ہوئے انہوں نے سالانہ منصوبے کی نقاب کشائی کی جس میں پورے سال کے دوران اہم بین الاقوامی نمائشوں میں پاکستانی فرنیچر مصنوعات کی نمائش کا کینڈر شامل ہے۔
انہوں نے کہا کہ اس سے نہ صرف نئی منڈیوں کی تلاش بلکہ غیر ملکی خریداروں کو راغب کرنے میں بھی مدد ملے گی۔ انہوں نے کہا کہ عالمی منڈیوں میں اپنی پوزیشن کو مضبوط کرنے کیلئے پی ایف سی غیر ملکی ہم منصبوں کے ساتھ شراکت داری کو فروغ دینے کی کوششیں کرے گی۔
انہوں نے مزید کہا کہ اس پلان میں فرنیچر انڈسٹری میں ایسے مشترکہ منصوبوں کی اہمیت پر زور دیا گیا ہے جو پاکستانی فرنیچر کو بین الاقوامی سطح پر آگے بڑھا سکتے ہیں۔ انہوں نے کہا کہ معروف بین الاقوامی نمائشوں میں شرکت کے ذریعے پی ایف سی پاکستانی فرنیچر، دستکاری، اختراعات اور منفرد ڈیزائنوں کو اجاگر کرنے کی کوشش کرے گی۔
اس سے نہ صرف برآمدات کے فروغ کے مواقع میسر آئیں گے بلکہ اپنے ہم منصبوں کے ساتھ خیالات کے تبادلے میں بھی مدد ملے گی۔ انہوں نے کہا کہ پی ایف سی کا بنیادی مقصد عالمی فرنیچر مارکیٹ میں ایک اہم کھلاڑی کے طور پر پاکستان کی پوزیشن کو مضبوط کرنا اوربین الاقوامی نمائشوں سے فائدہ اٹھاتے ہوئے ترقی و تعاون کی نئی راہیں کھولنا ہے۔
Short Link: https://urdu.app.com.pk/urdu/?p=431861
