ملتان۔ 06 مارچ (اے پی پی):ملتان الیکٹرک پاؤر کمپنی (میپکو ) کا ریجن میں نادہندگان اور بجلی چوروں کے خلاف آپریشن جاری ہے۔ جنوبی پنجاب میں ایک روز میں 76 افراد بجلی چوری کرتے ہوئے پکڑے گئے۔ میپکو ترجمان کے مطابق بجلی چوروں کو مجموعی طور پر 44 لاکھ 54 ہزار روپے جرمانہ عائد کیا گیا ،4 لاکھ روپے سے زائد جرمانہ موقع پر وصول کر لیا گیا، اس کے علاوہ 25 بجلی چوروں کے خلاف مقدمات درج کرائےگئےجبکہ 5 بجلی چوروں کو موقع پر گرفتار کیا گیا۔
دریں اثنا1 روز میں رننگ اور ڈیڈ ڈیفالٹرز سے 2 کروڑ روپے سے زائد کی واجب الادا رقم وصول کر لی گئی۔جنوبی پنجاب میں نادہندہ زرعی ٹیوب ویل صارفین کے خلاف آپریشن کرتے ہوئے احمد یار سب ڈویژن ساہیوال میں 24 لاکھ روپے سے زائد واجبات کی عدم ادائیگی پر ایک ٹیوب ویل کی بجلی منقطع کردی گئی جبکہ میپکو ٹیم نے نادہندہ زرعی ٹیوب ویل کا بجلی میٹر اور ٹرانسفارمر اتار لیا ۔اسی طرح رحیم یار خان اور مظفر گڑھ میں 2 نادہندہ کاشتکاروں نے کنکشنز منقطع ہونے پر 3 لاکھ 90 ہزار روپے واجبات ادا کیے۔
