اسلام آباد۔22مئی (اے پی پی):وزیراعظم محمد شہباز شریف نے کہا ہے کہ میکرو اکنامک سطح پر اصلاحات کے ساتھ ساتھ ادارہ جاتی اصلاحات میں تیزی لانا حکومت کی اولین ترجیح ہے ۔ان خیالات کا اظہار انہوں نے عالمی مالیاتی ادارے کے وفد سے گفتگو کرتے ہوئے کیا جس نے جہاد الظہور کی قیادت میں جمعرات کو یہاں ان سے ملاقات کی۔ ملاقات میں وفاقی وزراء احد خان چیمہ، محمد اورنگزیب، سیکرٹری خزانہ امداد اللہ بوسال،چیئرمین ایف بی آر راشد محمود لنگڑیال اور متعلقہ اعلیٰ حکام نے شرکت کی۔
وزیر اعظم آفس کے میڈیا ونگ کی طرف سے جاری بیان کے مطابق ملاقات میں پاکستان میں جاری آئی ایم ایف کے پروگرام پر بات چیت کی گئی اور حکومت کی آئی ایم ایف پروگرام پر عملدرآمد کے حوالے سے معاشی اصلاحات اور مثبت نتائج پر اطمینان کا اظہار کیا گیا۔ وزیر اعظم نے کہا کہ اللہ کے فضل و کرم سے پاکستان معاشی استحکام کے بعد ترقی کی جانب گامزن ہے، حکومت کی اولین ترجیح ہے کہ میکرو اکنامک سطح پر اصلاحات کے ساتھ ساتھ ادارہ جاتی اصلاحات میں بھی تیزی لائی جائے۔ وفد نے اصلاحات اور معاشی استحکام و ترقی میں آئی ایم ایف کی جانب سے تعاون جاری رکھنے کے عزم کا اظہار کیا۔
Short Link: https://urdu.app.com.pk/urdu/?p=600089
