اسلام آباد ۔ 28 مئی (اے پی پی) وزیر خارجہ مخدوم شاہ محمود قریشی نے کہا ہے کہ او آئی سی وزرائے خارجہ کونسل کے اجلاس میں ایک نئے امن منصوبہ اور ایران کی صورتحال سے پیدا ہونے والی کشیدگی اور تناؤ پر بات چیت کا امکان ہے، پاکستان اجلاس میں اس تناظر میں اپنا نقطہ نظر پیش کریگا۔ ان خیالات کا اظہار انہوں نے منگل کو او آئی سی وزرائے خارجہ کونسل کے اجلاس میں شرکت کیلئے سعودی عرب روانہ ہونے سے قبل میڈیا سے گفتگو کرتے ہوئے کیا۔ انہوں نے کہا کہ سعودی عرب میں اسلامی ممالک کی تنظیم کا اجلاس ہے جس کے لئے وزیر اعظم بھی تشریف لے جائیں گے۔ انھوں نے کہا کہ وہ او آئی سی کے کونسل آف فارن منسٹرز کا یہ اجلاس اس لیے بھی بہت اہمیت کا حامل ہے کہ اس اجلاس میں مشرقِ وسطیٰ کی صورتحال پر تبادلہ خیال کیا جائیگا۔ وزیر خارجہ نے کہا کہ ایک نیا امن منصوبہ جس کا تذکرہ ہو رہا ہے اس پر بھی اجلاس میں بات چیت ہوگی، ایران کی صورتحال جس میں کشیدگی اور تناؤ بڑھ رہا ہے اس حوالے سے بھی تبادلہ خیال ہونے کا امکان ہے ۔انھوں نے کہا کہ اس تمام تناظر میں پاکستان اس اجلاس میں اپنا نقطہ نظر پیش کریگا۔وزیر کارجہ نے یہ بھی بتایا کہ اجلاس کے دوران ان کی بعض وزراء خارجہ سے ملاقاتیں بھی طے ہیںجبکہ او آئی سی کے سیکریٹری جنرل سے بھی ملاقات ہو گی۔انہوں نے کہاکہ کشمیر رابطہ گروپ کا اجلاس بھی متوقع ہے جس میں کشمیر رابطہ گروپ کے ممبران اپنا نقطہ نظر پیش کریں گے۔
