جدہ ۔25اگست (اے پی پی):نائب وزیراعظم و وزیرِ خارجہ سینیٹر محمد اسحاق ڈار اسلامی تعاون تنظیم (او آئی سی) کے وزرائے خارجہ کے 21ویں غیرمعمولی اجلاس میں شرکت کے لیے جدہ پہنچ گئے۔
پیر کو دفتر خارجہ سے جاری بیان کے مطابق اجلاس آج او آئی سی سیکریٹریٹ جدہ میں منعقد ہو رہا ہے،جدہ کے کنگ عبدالعزیز انٹرنیشنل ایئرپورٹ پر پاکستان کے مستقل مندوب برائے او آئی سی فواد شیر، سعودی عرب میں پاکستان کے سفیر احمد فاروق اور جدہ میں پاکستان کے قونصل جنرل خالد مجید نے نائب وزیراعظم و وزیرِ خارجہ کا پرتپاک استقبال کیا۔
او آئی سی کےغیرمعمولی اجلاس میں او آئی سی کے رکن ممالک کے وزرائے خارجہ اور اعلیٰ حکام شرکت کریں گے،اجلاس میں فلسطین کی موجودہ صورتحال پر تفصیلی غور کیا جائے گاجو اسرائیلی فوجی جارحیت، غزہ پر مکمل فوجی کنٹرول کے مجوزہ منصوبوں اور فلسطینی عوام کے بنیادی انسانی حقوق کی بڑے پیمانے پر خلاف ورزیوں کے باعث مزید سنگین ہو گئی ہے۔
