گوجرانوالہ۔ 18 مارچ (اے پی پی):ضلعی انتظامیہ گوجرانوالہ کا پرائس کنٹرول ایکٹ کے تحت رمضان المبارک میں ناجائز منافع خوری کے خلاف بھرپور کریک ڈاؤن جاری، یکم رمضان سے اب تک 16 دنوں میں 06 لاکھ 14 ہزار سے زائد چھاپہ مار کاروائیاں کی گئیں اور 1482 خلاف ورزیوں پر 47 لاکھ 48 ہزار 05 سو روپے سے زائد کے جرمانے عائد، 32 مقدمات کا اندراج 1334 افراد گرفتار اور 2396 ناجائز منافع خوری میں ملوث چکن شاپس، گوداموں ودکانوں کو سیل کردیا گیا۔ پرائس کنٹرول مجسٹریٹس نے اشیائے ضروریہ کی مہنگے داموں فروخت کے حوالے سے درجنوں مارکیٹوں پر چھاپہ مار کاروائیاں کیں اور مصنوعی مہنگائی کا سبب بننے والے دوکانداروں کو جرمانے عائد کئے۔
انہوں نے کہا کہ اشیائے ضروریہ کی ارزاں نرخوں پر فروخت کو ہر صورت یقینی بنایا جائے گا۔ اس سلسلہ میں شہری ضلعی انتظامیہ کے ساتھ تعاون کریں اور جہاں کہیں بھی مہنگے داموں اشیائے ضروریہ کی فروخت ہو تو فوری نشاندہی کرتے ہوئے شکایات درج کروائیں تاکہ غیرقانونی منافع خوروں اور ذخیرہ اندوزوں کو قانون کے شکنجے میں لاتے ہوئے ان کے خلاف کاروائی عمل میں لائی جاسکے۔
ڈپٹی کمشنر نوید احمد نے مزید کہا کہ ماہ رمضان میں تمام اسسٹنٹ کمشنرز/ پرائس کنٹرول مجسٹریٹس مصنوعی مہنگائی اور ناجائز منافع خوری کی روک تھام اور دیگر غیرقانونی سرگرمیوں میں ملوث افراد کیلئے فیلڈ میں متحرک رہیں اور روزانہ کی بنیاد پر چھاپہ مار کاروائیاں کریں۔ صارفین کی جیبوں پر ڈاکہ ڈالنے والوں کو قانون کے شکنجے میں لائیں تاکہ صارفین کے حقوق کا تحفظ ممکن بناتے ہوئے مصنوعی مہنگائی کے جن کو قابو کیا جا سکے۔
انہوں نے مزید کہا کہ افسران ذمہ داریوں کو ایمانداری اور خلوص نیت سے سرانجام دیں اور عوام کو درست داموں پر بنیادی اشیاء خورد نوش کی فراہمی کے لئے پوری طرح متحرک رہیں اور مصنوعی مہنگائی کا باعث بننے والے کسی بھی فرد کے ساتھ کوئی رعائت نہ بڑتی جائے ان کے خلاف قانونی کاروائی عمل میں لائی جائے اور غیرقانونی سرگرمیوں میں ملوث افراد کو قانون کے مطابق سخت کارروائی کی جائے۔
Short Link: https://urdu.app.com.pk/urdu/?p=574000
