اسلام آباد۔2مارچ (اے پی پی):نامزد وزیراعظم میاں محمد شہباز شریف نے آل پاکستان نیوز پیپرز سوسائٹی ( اے پی این ایس) کے نومنتخب عہدیداران کو دلی مبارکباد پیش کی ہے ۔۔ ہفتہ کو یہاں جاری ایک بیان میں انہوں نے اے پی این ایس کی نومنتخب صدر نازآفرین سہگل لاکھانی، سیکرٹری جنرل سرمد علی، سینئر نائب صدر امتنان شاہد، نائب صدر محمد اسلم قاضی، جوائنٹ سیکریٹری سید محمد منیر جیلانی اور فنانس سیکرٹری شہاب زبیری کو مبارکباد پیش کی۔ انہوں نے اے پی این ایس ہائوس کراچی میں سالانہ اجلاس کے کامیاب اختتام پر منتخب ہونے والے عہدیداران کو دلی مبارکباد پیش کی ہے ۔
میاں محمد شہباز شریف نے متحرک اور آزاد پریس کی اہمیت کو تسلیم کرتے ہوئے نومنتخب قیادت کے لیے نیک خواہشات کا اظہار کیا۔ انہوں نے پاکستان میں صحافتی اقدار کو برقرار رکھنے اور پریس کی آزادی کو فروغ دینے میں اے پی این ایس کے اہم کردار کا اعتراف کیا۔ انہوں نے کہا کہ میں نومنتخب قیادت کو مبارکباد پیش کرتا ہوں۔ مجھے امید ہے کہ اے پی این ایس کی قیادت ایک آزاد اور ذمہ دار صحافت کی اقدار کو برقرار رکھنے کے لئے پرعزم رہے گی۔ میں اس ناگزیر کردار کو تسلیم کرتا ہوں جو اے پی این ایس عوامی رائے عامہ کو تشکیل دینے اور اقتدار میں بیٹھے لوگوں کو جوابدہ بنانے میں ادا کرتا ہے۔ پریس جمہوریت کی بنیاد ہے اور یہ ضروری ہے کہ ہم اس کی آزادی کی حمایت کریں اور اس کا تحفظ کریں۔
انہوں نے کہا کہ صدرنازآفرین سہگل لاکھانی اور ان کی ٹیم کی قابل قیادت میں اے پی این ایس صحافتی مہارت اور عوام کی آواز کے طور پر خدمات انجام دیتا رہے گا۔ ہم مل کر آنے والے چیلنجوں سے نمٹیں گے اور ایک ایسا ماحول پیدا کرنے کی کوشش کریں گے جہاں میڈیا پھل پھول سکے۔ انہوں نے کہا کہ میری حکومت اے پی این ایس اور وسیع تر میڈیا برادری کے شانہ بشانہ کھڑی رہے گی اور پرنٹ میڈیا انڈسٹری کی پائیداری کو یقینی بنانے کے لئے منصفانہ سلوک ، شفاف پالیسیوں اور حمایت میں اضافے کی پاسداری کرے گی۔ میاں شہباز شریف نے کہا کہ تیز رفتار تبدیلی اور ٹیکنالوجی کی ترقی کے اس دور میں ہمیں اپنی بنیادی اقدار پر قائم رہتے ہوئے اپنانے کی ضرورت ہے۔
اے پی این ایس نے پاکستان میں صحافت کے مستقبل کی تشکیل میں اہم کردار ادا کیا ہے۔ انہوں نے کہا کہ "میڈیا صرف ایک صنعت نہیں ہے، یہ عوام کی آواز ہے، سچائی کی محافظ اور جمہوریت کی بنیاد ہے۔ آئیے مل کر ان اصولوں کی پاسداری جاری رکھیں اور اپنی قوم کے روشن مستقبل کے لیے جدوجہد کریں۔ اے پی این ایس اپنی نئی قیادت کی سربراہی میں پرنٹ میڈیا انڈسٹری کے مفادات کو آگے بڑھانے اور ابھرتے ہوئے ڈیجیٹل منظرنامے میں درپیش بے شمار چیلنجز کا مقابلہ کرنے کے لئے پرعزم ہے۔\932\932
