لاہور۔19جنوری (اے پی پی):معروف گلوکارہ مہناز بیگم کی 12 ویں برسی 19جنوری بروز اتوارکو منائی گئی۔چار دہائیوں تک آواز کا جادو جگانے والی گلوکارہ مہناز بیگم 1955 میں کراچی میں پیدا ہوئیں۔ ان کا اصل نام کنیز فاطمہ تھا، وہ گلوکارہ کجن بیگم کی صاحب زادی تھیں۔
مہناز نے سرسید گرلز کالج سے بی اے کیا اور 1972 میں فنِ موسیقی میں قدم رکھا۔ان کو غزل، ٹھمری، دادرا، خیال، دروپد، سلام، نوحہ اور مرثیے پر مکمل دسترس تھی، پی ٹی وی کے پروگرام ”نغمہ زار”میں گائیکی کے بعد انکی شہرت فلم سکرین تک جا پہنچی، مہناز نے بے شمار فلموں میں اپنی میٹھی آواز کا جادو جگایا۔
گلوکارہ نے اپنی مسحور کن آواز سے کئی برس تک ریڈیو، ٹی وی اور فلم میں لاتعداد گیتوں کو پہچان دی، 13 مرتبہ نگار ایوارڈ حاصل کرنے سمیت حکومتِ پاکستان نے صدارتی تمغہ برائے حسنِ کارکردگی سے نوازا۔ گلوکارہ مہناز بیگم 19 جنوری 2013 کو اپنے خالقِ حقیقی سے جا ملیں۔
Short Link: https://urdu.app.com.pk/urdu/?p=548332
