اسلام آباد۔14مارچ (اے پی پی):نیشنل یونیورسٹی آف ماڈرن لینگویجز (نمل) اور نیشنل انفارمیشن ٹیکنالوجی بورڈ (این آئی ٹی بی) نے تعلیمی و صنعتی تعاون کو فروغ دینے کے لیے ایک مفاہمتی یادداشت (ایم او یو ) پر دستخط کیے ہیں۔ یہ معاہدہ نمل میں منعقدہ ایک خصوصی تقریب کے دوران طے پایا جس میں ڈائریکٹر جنرل نمل بریگیڈیئر شہزاد منیر اور سی ای او این آئی ٹی بی بابر مجید بھٹی سمیت دونوں اداروں کے سینئر عہدیداران نے شرکت کی۔
اس موقع پر بات چیت کرتے ہوئے بریگیڈیئر شہزاد منیر اور بابر مجید بھٹی نے اس معاہدے کو ڈیجیٹل تبدیلی اور اقتصادی ترقی کی سمت ایک اہم پیش رفت قرار دیا۔ انہوں نے اس شراکت داری کو ایک طویل المدتی تعاون کی ابتدا ءقرار دیتے ہوئے اس کے باہمی فوائد پر زور دیا اور اس معاہدے کے موثر نفاذ اور عملی اطلاق کے لیے اپنے بھرپور عزم کا اعادہ کیا۔اس معاہدے کے نفاذ کے عمل کو یقینی بنانے کے لیے نمل میں ایک سٹیئرنگ کمیٹی بھی تشکیل دی گئی ہے جو منصوبہ بندی، عملدرآمد اور نگرانی کے مراحل میں کلیدی کردار ادا کرے گی۔
اس شراکت داری کا بنیادی مقصد تعلیمی و صنعتی خلا کو پر کرنا ہے تاکہ تحقیق، ترقی اور علم کے تبادلے کو فروغ دیا جا سکے۔ اس تعاون کے ذریعے دونوں ادارے پاکستان میں تکنیکی مہارت کو مزید مستحکم بنانے اور ڈیجیٹل ترقی کی راہ ہموار کرنے کے لیے کام کریں گے۔مفاہمتی یادداشت کے تحت مشترکہ تحقیقی منصوبے تشکیل دیئے جائیں گے جن کے ذریعے نمل کے فیکلٹی ممبران اور طلبہ حقیقی آئی ٹی چیلنجز پر کام کرتے ہوئے ملک کے اختراعی نظام میں اپنا حصہ ڈال سکیں گے۔
مزید برآں اس معاہدے کے تحت آئی ٹی کے شعبے میں پیشہ ورانہ تربیت اور مہارت سازی کے مواقع فراہم کیے جائیں گے۔ نمل کے طلبہ کو این آئی ٹی بی کے منصوبوں میں انٹرن شپ کے مواقع میسر آئیں گے جس سے انہیں عملی تجربہ اور انڈسٹری سے وابستگی حاصل ہوگی۔ اس کے علاوہ، دونوں ادارے مشترکہ طور پر ورکشاپس، سیمینارز اور کانفرنسز کا انعقاد کریں گے جس سے آئی ٹی ماہرین اور طلبہ کے درمیان ایک مستقل سیکھنے کا ماحول پیدا ہوگا۔
اس معاہدے کا ایک اہم جزو "آئیڈیئیشن حب” کا قیام ہے جو آئی ٹی کے شعبے میں اختراع اور تخلیقی صلاحیتوں کو فروغ دینے کے لیے ایک منفرد پلیٹ فارم فراہم کرے گا۔ یہ حب طلبہ، محققین اور انڈسٹری ماہرین کو جدید حل پر کام کرنے کے لیے ایک جگہ فراہم کرے گا جس سے تکنیکی ترقی اور معاشی استحکام میں اضافہ ہوگا۔
Short Link: https://urdu.app.com.pk/urdu/?p=572599
