نمل کے زیر اہتمام "انگلش ورکس: ایڈمنسٹریٹرز اور اساتذہ” کی ملک گیر تربیتی پروگرام کا آغاز

اسلام آباد۔22فروری (اے پی پی):نیشنل یونیورسٹی آف ماڈرن لینگویجز (این یو ایم ایل) نے انگلش ورکس:” ایڈمنسٹریٹرز اور اساتذہ” سے متعلق ملک گیر تربیتی پروگرام کا آغاز کر دیا ، پروگرام کا مقصد پاکستانی نوجوانوں کو پیشہ ورانہ کامیابی کیلئے ضروری مہارتوں سے آراستہ کرنا ہے ۔”انگلش ورکس” ایک امریکی امداد یافتہ منصوبہ ہے جو ریجنل انگلش لینگویج آفس کے تحت چلایا جا رہا ہے۔

پروگرام کا دائرہ کار کاروباری اور پیشہ ورانہ انگریزی، تنقیدی سوچ، مسئلہ حل کرنے کی مہارت، شخصی ترقی، اور 21ویں صدی کی ڈیجیٹل اور سافٹ اسکلز پر محیط ہے۔ اب تک 6,000 نوجوان اس سے مستفید ہو چکے ہیں، جبکہ 2023 سے 2025 کے دوران این یو ایم ایل مزید 2,655 طلبہ کو تربیت فراہم کر رہا ہے تاکہ وہ اپنے مستقبل کے لیے بہتر طور پر تیار ہو سکیں۔افتتاحی تقریب کی صدارت ریکٹر نمل میجر جنرل شاہد محمود کیانی ہلال امتیاز (ملٹری) (ریٹائرڈ) نے کی، جبکہ امریکی سفارت خانے کے ریجنل انگلش لینگویج آفس کے سربراہ جیرالڈ فرینک مہمان خصوصی تھے۔تقریب سے خطاب کرتے ہوئے ریکٹر نمل نے پاکستانی نوجوانوں کیلئے روزگار سے متعلق مہارتوں کی اہمیت کو اجاگر کیا اور اساتذہ کی تربیت پر زور دیا تاکہ وہ طلبہ کی پیشہ ورانہ ترقی میں معاون ثابت ہو سکیں۔ انہوں نے اس طرح کے پروگراموں کے ذریعے پاکستان کی سماجی و اقتصادی ترقی اور عالمی سطح پر ایک ترقی پسند قوم کے طور پر مثبت تشخص کو اجاگر کرنے کی ضرورت پر زور دیا۔

امریکی سفارت خانے کا شکریہ ادا کرتے ہوئے، انہوں نے ان پروگراموں کی اہمیت بیان کی جو نوجوانوں کو فری لانسنگ، ای کامرس اور ڈیجیٹل مارکیٹنگ جیسے شعبوں میں کامیابی کے لیے تیار کرتے ہیں، تاکہ وہ بڑھتی ہوئی ای-اکانومی کے مواقع سے فائدہ اٹھا سکیں۔ جیرالڈ فرینک نےانگلش ورکس پروگرام کی قیادت پر خوشی کا اظہار کیا ، کراچی سے خیبر اور گلگت تک "انگلش ورکس!” کے مختلف مراکز کے دوروں پر اپنے تاثرات بیان کیے اور نمل کی کاوشوں کو سراہا، جو انگریزی اور دیگر زبانوں میں معیاری تعلیم فراہم کر کے ملک بھر میں کمیونٹیز کو مستحکم کر رہی ہے۔اس موقع پر ریجنل انگلش لینگویج آفس اور نمل کے اعلیٰ حکام کے علاوہ ملک بھر کے مختلف شہروں سے تعلق رکھنے والے انگلش ٹیچرز کی بڑی تعداد نے شرکت کی۔

Short Link: https://urdu.app.com.pk/urdu/?p=564769