کوئٹہ۔ 02 ستمبر (اے پی پی):سینئر سیاستدان و سابق سینیٹر نوابزادہ حاجی میر لشکری خان رئیسانی نے سائنس کالج میں آتشزدگی کے واقعہ میں ہونے والے نقصانات پر افسوس کا اظہار کرتے ہوئے کہا ہے ہنگامی بنیادوں پر کالج میں کلاسز کا آغا ، واقعے کی تحقیقات اور ذمہ داروں کے خلاف کارروائی کی جائے ۔ یہ بات انہوں نے اتوار کو وفد کے ہمراہ کوئٹہ سائنس کالج کے دورے کے بعد صحافیوں سے بات چیت کرتے ہوئے کہی۔دورہ کے دوران انہوں نے کالج کے متاثرہ حصوں کو دیکھا اور پرنسپل و دیگر سے ملاقات بھی کی ۔صحافیوں سے بات چیت کرتے ہوئے انہوں نے کہا کہ بلوچستان کے قدیم تعلیمی ادارے میں گزشتہ شب لگنے والی آگ سے کالج کی عمارت کو شدید نقصان پہنچا ہے جس سے یہاں زیر تعلیم ہزاروں طلباء کا تدریسی عمل متاثر ہونے کا خدشہ ہے ۔
انہوں نے کہا کہ فائر بریگیڈ کا دفتر کالج سے تھوڑئے ہی فاصلے پر واقع ہے اس کے باوجود کئی گھنٹوں تک آگ پر قابو کیوں نہیں پایا جاسکا ،انہوں نے کہا کہ نقصانات کو دیکھتے ہوئے یہ بات کہی جاسکتی ہے کہ ذمہ داروں نے اپنی ذمہ داریاں پوری نہیں کیں ، جو لوگ اس ادارے اور وزارت کے ذمہ دار ہیں وہ فوری مستعفی ہوجائیں ۔انہوں نے کہا کہ یہاں آکر سنا کے شارٹ سرکٹ کے باعث آگ لگی ہے ضرورت آس امر کی ہے کہ تمام تعلیمی اداروں میں اس قسم کے واقعات سے بچنے کیلئے انتظامات کو یقینی بنایا جائے تاکہ آئندہ اس قسم کے واقعات سے مزید کوئی نقصان نہ ہو ۔انہوں نے مطالبہ کیا کہ صوبائی حکومت ہنگامی بنیادوں پر کالج میں کلاسز کا آغا کرئے ، واقعے کی تحقیقات کرائی اور ذمہ داروں کے خلاف کارروائی کی جائے۔
