اسلام آباد۔19اکتوبر (اے پی پی):وفاقی وزراءنے سزایافتہ سابق وزیراعظم نواز شریف کے پاک فوج کیخلاف جھوٹی الزام تراشی پر مبنی تقاریر کو نریندر مودی کے بیانیہ کی ترجمانی قرار دیتے ہوئے کہا ہے کہ بنارسی ٹھگوں کا ٹولہ پاکستان کو پیچھے دھکیلنے کی سازشیں کررہا ہے۔ اپوزیشن جماعتوں نے ایف اے ٹی ایف قانون کے موقع پر بلیک میل کرنے کی کوشش کی مگر ناکام ہوئے، پی ڈی ایم کے سربراہ فضل الرحمان آج جن اسمبلیوں کو جعلی کہہ رہے ہیں انہی اسمبلیوں سے وہ صدر مملکت بننے کی کوششیں کرتے ہوئے ناکام ہوئے تو الزام تراشی کا سلسلہ شروع کردیا ۔ وزیراطلاعات ونشریات سینیٹرشبلی فراز نے کہا کہ حکومت اپوزیشن کی جلسیوں سے خوفزدہ نہیں ہے، جواب دینا ہمارا فرض ہے تاکہ صورت حال واضح رہے، بنارسی ٹھگوں کے ٹولے کا مقصد پاکستان کوپیچھے دھکیلنا ہے، 2018ءکے الیکشن میں عوام نے ان عناصر کو مسترد کیا، یہ عناصراپنی لوٹ مار اور کرپشن کا تحفظ چاہتے ہیں، یہ کاروباری لوگ تھے انھوں نے اپنی سہولت کے مطابق نظام چلایا، انہوں نے ذاتی مفادات کے لیے ملک کے وسائل کو لوٹا اور اداروں کو مفلوج کیا، ملک میں جتنے بھی ادارے تھے انہیں بتدریج تباہ کیا گیا۔ اپوزیشن نے ایف اے ٹی ایف قانون پر بلیک میل کرنےکی کوشش کی، یہ چاہتے ہیں ایک ارب سے کم کی رقم کامعاملہ کرپشن میں نہ شمارکیا جائے۔ شبلی فرازکا کہنا تھا کہ مولانا فضل الرحمان نے رٹ لگا رکھی ہے کہ یہ اسمبلی جعلی ہے، مولانا فضل الرحمان جس اسمبلی کو جعلی کہتے ہیں اسی سے صدربننے کی کوشش کی، ایک نوسربازخود کو بیمار بنا کرملک سے باہرچلا گیا، نوازشریف قانون سے بالاتر نہیں ہے ، انہیں واپس آکر جواب دینے چاہئیں، نوازشریف کی واپسی کیلئے حکومت اقدامات کرےگی، انہیں واپس لاکر عام جیل میں ڈالیں گے۔ کیپٹن ریٹائرڈ صفدر کی گرفتاری پرشبلی فراز نے کہا کہ قائداعظم کے مزار پر ہلڑبازی کوئی برداشت نہیں کرسکتا، کیپٹن (ر) صفدرنے پاکستان اورعوام کی توہین کی ہے، اس لیے وہ گرفتار ہوئے اور ان کی گرفتاری کا سیاست سے کوئی تعلق نہیں۔ وفاقی وزیر برائے سائنس و ٹیکنالوجی فواد چودھری نے سماجی رابطے کی ویب سائٹ ٹوئٹر پر اپنے بیان میں کہا ہے کہ سندھ پولیس کا کیپٹن(ر)صفدر کی گرفتاری کا عمل قانون کے احترام کا بیانیہ ہے، قائداعظم محمد علی جناح کی قبر اور ان کا مزار کم ظرف سیاسی قیادت کے کھیل کا میدان نہیں بننے دیا جائیگا کیونکہ یہ جگہ ہر پاکستانی کےلئے مقدس جگہ ہے۔ قائداعظم کے مزار پر اٹھکیلیاں، نعرے بازی اور غیر سنجیدہ طرز عمل قانون کےخلاف ہے جس پر سزا ہونی چاہیے۔وفاقی وزیر ہوا بازی غلام سرور خان نے بھی پاک فوج کی قیادت پرزبانی حملوں کی شدید مذمت کرتے ہوئے کہا ہے کہ انسانیت کے دشمنوں پر لعنت بھیجتا ہوں، پی ڈی ایم جلسے میں 11جماعتوں کے رہنما موجود تھے،مگر ان میں سے کسی ایک نے بھی پاک فوج پر حملے کی مذمت تک نہیں کی۔ راولپنڈی میں پریس کانفرنس کرتے ہوئے غلام سرور خان نے کہا کہ یہ کھاتے پاکستان کا، لوٹتے پاکستان کو اور کام پاکستان کےخلاف کرتے ہیں۔ وفاقی وزیر غلام سرور خان نے کہا کہ پوری قوم اپنے اداروں کےساتھ ہے، فوج کےساتھ ہے، پاکستان کی افواج ہماری سرحدوں کی محافظ ہیں۔ انہوں نے کہا کہ اپوزیشن لیڈروں کو فوج کےخلاف بات کرتے ہوئے شرم آنی چاہیے، ففتھ جنریشن وار یہی ہے کہ اداروں کےخلاف جنگ کی جائے۔ یہود و ہنود کا یہی ایجنڈا ہے کہ پاکستان میں اداروں کو اداروں سے لڑایا جائے۔ وفاقی وزیر برائے بحری امور اور تحریک انصاف کے رہنما علی حیدر زیدی کا کہنا ہے کہ مزارِقائد کی بے حرمتی کرنےوالے اوباشوں کےخلاف آئی جی سندھ کی فوری کارروائی قابل تحسین ہے، قانون ہرحال میں نافذ ہونا چاہیے۔علی زیدی نے کہا کہ مریم نواز ایک مرتبہ پھرجھوٹ بول رہی ہیں کہ ہوٹل کا دروازہ توڑا گیا، ویڈیو اس کے برعکس ہے۔وفاقی وزیر نے کہا کہ ووٹ کی نام نہاد عزت کے نعرے مارنے والوں کیلئے یہی پیغام ہے کہ کردار، روئیے اور اخلاق سے ووٹ کی عزت طے ہوتی ہے، مجرموں کے خالی نعرے مارنے سے ووٹ کا تحفظ ممکن نہیں ہے ، پاکستانی قوم کرپٹ سیاستدانوں کو مزید برداشت نہیں کرےگی۔وفاقی وزیر تعلیم شفقت محمود نے بھی مزار قائد کی بے حرمتی کرنے پر درج ہونیوالی ایف آئی آر کو قانون کے عین مطابق صحیح کارروائی قرار دیتے ہوئے کہا ہے کہ بابائے قوم کے مزار کا تقدس پامال کرنے کی کسی کو بھی اجازت نہیں دی جاسکتی۔ اسلام آباد کے سیاسی و عسکری مبصرین نے بھی سابق وزیراعظم نواز شریف کی پاک فوج کے سربراہ جنرل قمر جاوید باجوہ اور ڈی جی آئی ایس آئی لیفٹیننٹ جنرل فیض حمید کیخلاف تقار یر کوبھارتی وزیراعظم نریندر مودی کا بیانیہ قرار دیتے ہوئے کہا ہے کہ پوری قوم بخوبی آگاہ ہے کہ پاکستان کی مسلح افواج کو اس وقت حالات جنگ کا سامنا ہے ، بھارتی سیکورٹی فورسز آئے روز لائن آف کنٹرول پر سرحدی خلاف ورزیوں کا ارتکاب کرکے اشتعال انگیزیاں کررہی ہیں،ایسے حالات میں سابق وزیراعظم نواز شریف کاقومی سلامتی کے ضامن اداروں کے سربراہان کیخلاف وشنام طرازی کرنا کھلی ملک دشمنی کے مترادف ہے جس کاحکومت اوراعلیٰ عدلیہ کوفوری نوٹس لیکر ملک کے قوانین کے مطابق کارروائی کرنی چاہیے۔ انہوں نے کہا ہے کہ ملک سے خطرناک بیماری کے علاج کےلئے لندن جانیوالے سزایافتہ سابق وزیراعظم نواز شریف نے اپنی بداعمالیوں اور جرائم کے تحفظ کےلئے ملکی اداروں کو بلیک میل کرنے کےلئے پی ڈی ایم تشکیل دیکرخطرناک سیاسی کھیل شروع کردیا ہے جبکہ پی ڈی ایم خود چوروں اور سیاسی ٹھگوں کا ایک ٹولہ ہے۔ نواز شریف کا گوجرانوالہ کے جلسے میں ویڈیو لنک خطاب میں پاک فوج کے سربراہ کو نام لیکربار بار للکارنا انتہائی ناقابل قبول سیاسی سلسلہ ہے جس کا سختی سے فوری سدباب نہ کیا گیا تو ملک میں انارکی پھیلنے کے خدشات بڑھتے چلے جائیں گے، اس لیے دانشمندی کا تقاضا ہے کہ غیر ملکی آقاﺅں کے اشاروں پر چلنے اورمودی کی زبان بولنے والے نواز شریف کی ملک دشمن سرگرمیوں کا سختی سے قلع قمع کیا جائے۔ انہوں نے کہا ہے کہ گزشتہ روز بابائے قوم کے مزار کے احاطہ میں نواز شریف کے داماد نے ایک سوچے سمجھے منصوبے کے تحت سیاسی نعرہ بازی کرتے ہوئے بابائے قوم کے مزار کے وقار اور تقدس کو پامال کیا جوکہ انتہائی شرمناک طرز عمل ہے۔ انہوں نے کہا کہ کراچی میں بابائے قوم کے مزار کی حرمت پامال کرنے کے تحت گرفتاری کے بعد کیپٹن صفدر کی ضمانت پر رہائی کے بعد آرمی چیف کیخلاف اشتعال انگیز نعرہ بازی سے بھی ثابت ہوگیا ہے کہ نواز شریف مریم نواز اور کیپٹن صفدر وغیرہ ملک کی عسکری قیادت کے صبروتحمل سے ناجائز فائدہ اٹھا رہے ہیں اور جان بوجھ کر ملک میں حالات کو خراب کرنا چاہتے ہیں ۔ انہوں نے ملک کی اعلیٰ عدلیہ اور وزیراعظم پاکستان سے مطالبہ کیاہے کہ وہ نواز شریف کے فتنے کو بڑھنے سے روکنے کےلئے آئین و قانون کے مطابق سخت گیر عملی اقدامات کریں تاکہ اس فتنے کو بڑھنے سے روکا جاسکے۔
