نوشہروفیروز۔ 20 جنوری (اے پی پی):ڈپٹی کمشنر نوشہر و فیروز محمد ارسلان سلیم کی صدارت میں سات روزہ قومی انسداد پولیو مہم کے انتظامات کا جائزہ لینے کے سلسلے میں ایک اجلاس کمیٹی روم میں منعقد ہوا۔ اجلاس میں بتایا گیا کہ 03 فروری سے 09 فروری 2025 سے ضلع میں قومی انسداد پولیو مہم شروع ہوگی ۔اجلاس میں ڈسٹرکٹ ہیلتھ آفیسر ڈاکٹر غلام قادر چانڈیو، ایڈیشنل ڈپٹی کمشنر ون لیاقت علی بلوچ، پی ای او عالمی ادارہ صحت ڈاکٹر غلام علی سولنگی، کمیونیکیشن آفیسر علی اکبر جونیجو، اے ایف پی سرویلنس آفیسر شبیر الحسنین اور دیگر افسران موجود تھے۔
اس موقع پر خطاب کرتے ہوئے ڈپٹی کمشنر نے کہا کہ ملک میں پولیو کے بڑھتے ہوئے کیسز ظاہر ہونے کے بعد ہماری ذمہ داری مزید بڑھ گئی ہے اس لئے ہمیں مہم کے دوران مزید سنجیدگی کا مظاہرہ کرنے کی ضرورت ہے۔ انہوں نے کہا کہ ٹیموں کی نگرانی کے عمل کو مزید بہتر کرنے کی ضرورت ہے انہوں نے کہا کہ ہر تحصیل کے اسسٹنٹ کمشنر اور میں خود بھی مارننگ اسمبلی میں شرکت کروں گا ۔ ٹیموں کو بروقت فیلڈ میں روانہ کیا جائے اور کسی بھی فرد کو کسی بھی قسم کی غفلت برتنے کی اجازت نہیں دی جاسکتی ،غفلت کے مرتکب افراد کے خلاف سخت سے سخت قانونی کاروائی کی جائے گی۔
اس سے قبل پولیو مہم کے فوکل پرسن ڈاکٹر وجے کمار نے اجلاس کو بتایا کہ ضلع کے پانچ سال کی عمر تک کے 295592 بچوں کو پولیو کے قطرے پلانے کے لئے 1025 ٹیمیں تشکیل دی گئی ہیں جن میں 893 موبائل، 18ایس ایم ٹی،73 فکس، 41 ٹرانزٹ پوائنٹ ٹیمیں شامل ہیں۔
Short Link: https://urdu.app.com.pk/urdu/?p=548788
