واشنگٹن۔15جنوری (اے پی پی):نومنتخب امریکی صدر جوبائیڈن نے اقتدار کی منتقلی سے قبل کورونا وائرس سے متاثرہ معیشت کی بحالی اور کورونا وائرس پر قابو پانےکے لیے 19کھرب ڈالر کا امدادی پیکج پیش کر دیا۔برطانوی خبر رساں ادارے کے مطابق اس پیکج میں کورونا وائرس سے نمٹنے کے لیے 415 ارب ڈالر اور چھوٹے کاروباروں کے لیے 440 ارب ڈالر مختص کیے گئے ہیں ۔ یہ امددای پیکج منظوری کے لیے کانگریس کے پاس بھیجا جائے گا اور اگر کانگریس اس پیکج کو منظور کرلیتی ہے تو اس پیکج کے تحت دس کھرب ڈالر امریکی خاندانوں کے لیے بھی مختص کیے جائیں گے جس میں امریکی شہریوں کو 1400 ڈالر بھی فراہم کیے جائیں گے جو حال ہی میں منظور ہونے والے کووڈ۔ 19 بل کے علاوہ ہیں۔جوبائیڈن نے امددای پیکج پیش کرتے ہوئے گزشتہ روز ریاست ڈیلاویر کے شہر ولمنگٹن سے اپنے خطاب میں کہا کہ امریکہ میں کورونا وائرس کے باعث انسانی صورتحال کے شدید بحران سے امریکیوں کی صحت شیدہ خطرہ ہے اور اس بحران سے نمٹنے کے لیے ہمیں ابھی سے اقدامات کرنے ہوں گے کیونکہ ہمارے پاس مزید ضائع کرنے کے لیے مزید وقت نہیں ہے ۔ انہوں نے کہا کہ مشکلات کو حل کرنے میں رکاوٹیں حائل ہوں گی لیکن میں صورتحال میں پیشرفت سے متعلق آگاہی میں آپ سے ایمانداری سے کام لوں گا ۔ جو بائیڈن کی جانب سے امدادی پیکج کا اعلان امریکی معیشت کو بچانے کے منصوبے کا حصہ ہے جس کے تحت ان کا اپنی صدارت کے پہلے 100 روز میں ایک کروڑ افراد کو کورونا ویکسین لگانے کا منصوبہ ہے۔
