نکاسی آب کا مناسب نظام اوردریائوں کے قریب غیر قانونی تعمیرات ختم کرنے سے نقصانات کو کم کرنے میں مدد ملے گی،وفاقی وزیر ڈاکٹر مصدق ملک

اسلام آباد۔3ستمبر (اے پی پی):وفاقی وزیر برائے موسمیاتی تبدیلی اور ماحولیاتی رابطہ ڈاکٹر مصدق ملک نے کہا ہے کہ نکاسی آب کا مناسب نظام اور دریائی علاقوں کے قریب غیر قانونی تعمیرات کو ہٹانے سے نقصانات کو کم کرنے میں مدد مل سکتی ہے۔نجی ٹی وی سے گفتگو کرتے ہوئے انہوں نے کہا کہ نوجوانوں کو جدید ٹیکنالوجی سے آراستہ کرنے کی بھی ضرورت ہے تاکہ مستقبل میں سیلاب سے متعلق چیلنجز سے نمٹنے کیلئے نئے منصوبے شروع کئے جا سکیں۔قبل از وقت وارننگ سسٹم کے بارے میں سوال کے جواب میں انہوں نے کہا کہ پیش گوئی کے نظام میں بہتری لائی جا رہی ہے۔انہوں نے کہا کہ موثر منصوبہ بندی، جدید ٹیکنالوجی اور فنڈز کا صحیح استعمال موسمیاتی تبدیلی کے مسائل کو کم کرنے میں مدد کر سکتا ہے۔