لاہور۔14ستمبر (اے پی پی):نگران وزیر اعلی پنجاب محسن نقوی نے جمعرات کے روز فاطمہ جناح انسٹیٹیوٹ آف مدر اینڈ چائلڈاور گنگا رام ہسپتال کا اڑھائی گھنٹے طویل دورہ کیا۔وزیراعلی محسن نقوی نے مریضوں اورتیمارداروں کی شکایات اور نئی عمارت میں نقائص دیکھ کر شدید برہمی کااظہار کرتے ہوئے ایم ایس ہسپتال،پراجیکٹ ڈائریکٹر اور ایکسین کی سرزنش کی اورتینوں کو سخت وارننگ دی۔ وزیراعلی محسن نقوی نے فاطمہ جناح انسٹیٹیوٹ آف مدر اینڈ چائلڈکی ایمرجنسی،وارڈز سمیت 8فلور اور2بیسمنٹ کا معائنہ کیا۔وزیراعلی تمام فلورز پر گئے اور فنشنگ کے کاموں کاجائزہ لیا، فاطمہ جناح انسٹیٹیوٹ آف مدر اینڈ چائلڈ کے ویٹنگ روم میں کرسیاں تھیں نہ بینچ،مریض خواتین زمین پر چادر بچھا کر بیٹھی ہوئی تھیں۔
محسن نقوی نے ایم ایس کو مخاطب کرتے ہوئے کہاکہ مریض خواتین کیلئے ایمرجنسی 6ماہ سے آپریشنل ہے تو ویٹنگ روم میں کرسیاں نہ لگنے کاکوئی جواز نہیں، مریضوں کے تیماردار نومولود بچے دیکھنے کے لئے بھی زچہ و بچہ وارڈ کے باہر گارڈزاور آیاکو پیسے دینے پر مجبور تھے،مریضوں کے تیمارداروں نے وزیراعلی محسن نقوی کے سامنے شکایات کے انبار لگا دئیے،مریضوں سے پیسے لینے والے گارڈز او رآیا کو معطل کر دیاگیا اور وصول شدہ پیسے تیمارداروں کو واپس کئے گئے،انسٹیٹیوٹ کے کئی فلور کے خالی کمروں میں اے سی چل رہے تھے جبکہ ایمرجنسی کے بعض حصوں میں خواتین مریضوں کے لئے اے سی بند تھے۔
محسن نقوی نے بجلی کے بلوں کا ریکارڈ بھی طلب کیا،نئی عمارت کی دیواروں اور چھتوں میں پانی کی لیکج اور فرشوں پر بھی پانی موجود تھا۔ وزیراعلی نے پانی کی لیکج کا مسئلہ ترجیحی بنیادوں پر حل کرنے کا حکم دیا،بعض مریضوں کے تیمارداروں نے بلڈ بنک سے مطلوبہ خون نہ ملنے کی شکایات کیں۔ وزیراعلی نے گیس پلانٹ، چھت اور بیسمنٹ میں پارکنگ ایریا کا بھی وزٹ کیا۔وزیر اعلی گنگارام ہسپتال بھی گئے ، مختلف وارڈز کا دورہ کیا اورمریضوں کی خیریت دریافت کی اور مفت ادویات کی فراہمی سمیت ٹیسٹ کی سہولت کے بارے میں پوچھا،ہسپتال کے کئی وارڈز میں نہ اے سی تھا اور نہ ہی پنکھے چل رہے تھے۔
وزیراعلی نے ساندہ کی رہائشی خاتون کی درخواست پر اس کی زیر علاج بہن کو فوری طورپر آئی سی یو میں شفٹ کرنے کی ہدایت کی، منڈی فیض آباد کے رہائشی خاندان کی بچی ثنا کا علاج بہترین پروفیسر سے کرانے کی ہدایت کی، گنگارام ہسپتال کے بعض اہم شعبوں کو فاطمہ جناح انسٹیٹیوٹ میں شفٹ کرنے کا پلان طلب کرلیا۔محسن نقوی نے کہاکہ فاطمہ جناح انسٹیٹیوٹ اورگنگارام ہسپتال کوبھی بہتر بنایا جائے گا، آئندہ مجھے مریضوں اور تیمارداروں سے پیسے لینے کی شکایت ملی تو ہسپتال انتظامیہ کے خلاف کارروائی ہوگی۔ صوبائی وزیرسپیشلائزڈ ہیلتھ کیئر اینڈ میڈیکل ایجوکیشن ڈاکٹر جاوید اکرم،سیکرٹری صحت،سیکرٹری تعمیرات ومواصلات بھی ان کے ہمراہ تھے۔
Short Link: https://urdu.app.com.pk/urdu/?p=390697
