نیشنل ایمرجنسیز آپریشن سینٹر نے گوجرانوالہ، لاہور اور گجرات ڈویژن کے سیلاب سے متاثرہ علاقوں میں اگلے 12 سے 18 گھنٹوں کے دوران شدید بارشوں کے امکان کا اظہار

اسلام آباد۔29اگست (اے پی پی):نیشنل ڈیزاسٹر مینجمنٹ اتھارٹی(این ڈی ایم اے )کے نیشنل ایمرجنسیز آپریشن سینٹر نے گوجرانوالہ، لاہور اور گجرات ڈویژن کے سیلاب سے متاثرہ علاقوں میں اگلے 12 سے 18 گھنٹوں کے دوران شدید بارشوں کا امکان ظاہر کیا ہے۔جمعہ کو این ڈی ایم اے سے جاری کردہ بیان کے مطابق یہ بارشیں موجودہ سیلابی صورتحال کو مزید خراب کر سکتی ہیں، کیونکہ دریائے ستلج، راوی اور چناب میں پہلے ہی غیر معمولی بلند پانی کا بہائو ہے۔این ڈی ایم اے نے شہریوں کو ہدایت کی ہے کہ دریائوں، ندیوں اور نالوں سے دور رہیں،غیر ضروری سفر سے گریز کریں، حفاظتی اقدامات یقینی بنائیں ، انتظامیہ کی ہدایات پر عمل کریں ،بجلی کی تاروں اور پانی جمع ہونے والے علاقوں سے دور رہیں۔