اسلام آباد۔24فروری (اے پی پی):نیشنل ایمرجنسیز آپریشن سینٹر (این ای او سی) کی جانب سے 24فروری تا یکم مارچ 2025تک ممکنہ موسم کی صورتحال کے حوالے سے ایڈوائزری جاری کی گئی ہے۔ ایڈوائزری کے مطابق ملک میں داخل ہونے والے نئے موسمی سلسلے کے باعث شمالی اور مغربی علاقوں میں برف باری، گرج چمک کے ساتھ بارش، آندھی اور ژالہ باری کا امکان ہے۔
ایڈوائزری کے مطابق اسلام آباد، بالائی پنجاب،خطہ پوٹھوہار، وسطی،جنوبی اور جنوب مشرقی پنجاب میں بارش، آندھی اور گرج چمک کے ساتھ برف باری / ژالہ باری کا امکان ہے۔ موسلا دھار بارش کے باعث مختلف علاقوں میں سیلابی صورتحال پیدا ہوسکتی ہے۔ بلوچستان میں صوبے کے مغربی، شمال مغربی اور شمالی علاقوں میں بارش، آندھی اور گرج چمک کے ساتھ بارش جبکہ پہاڑی علاقوں میں برف باری کا امکان ہے۔
علاوہ ازیں خیبرپختونخوا میں مالاکنڈ اور ہزارہ ڈویژن سمیت بالائی اور مغربی خیبر پختونخوا کے پہاڑی علاقوں میں برف باری،گرج چمک کے ساتھ بارش، آندھی اور ژالہ باری کا امکان ہے۔ ایڈوائزری میں خبردار کیا گیا ہے کہ شمالی خیبر پختونخوا میں شدید بارشیں سیلاب اور لینڈ سلائیڈنگ کا باعث بن سکتی ہیں۔
گلگت بلتستان اور آزاد جموں و کشمیر میں گرج چمک کے ساتھ بارش، آندھی، اور پہاڑی علاقوں میں برف باری کے ساتھ ژالہ باری متوقع ہے جس سے سفری اور معمول کی سرگرمیاں متاثر ہو سکتی ہیں۔ اس دوران سندھ میں موسم زیادہ تر سرد اور خشک رہنے کی پیش گوئی کی گئی ہے۔
این ڈی ایم اے موسمی صورتحال کی مسلسل نگرانی کر رہا ہے اور متعلقہ اداروں کو بھی ضروری ہدایات جاری کر رہا ہے تاکہ کسی بھی ہنگامی صورتحال کے دوران بروقت رسپانس،با لخصوص مری، گلیات اور شمالی علاقوں میں ممکنہ برف باری کے خطرے کے پیش نظر ضروری اقدامات کو یقینی بنایا جا سکے۔
این ڈی ایم اے نے عوام سے گزارش کی ہے کہ سفر سے پہلے موسم کی تازہ ترین صورتحا ل سے آگاہی کے لئے ”پاک این ڈی ایم اے ڈیزاسٹر الرٹ ایپ” استعمال کریں۔
Short Link: https://urdu.app.com.pk/urdu/?p=565487
