ملتان۔ 22 مارچ (اے پی پی):نیشنل ٹی ٹوئنٹی کپ ،پشاور کی ٹیم کوئٹہ کو 126 رنز سے ہرا کر کوارٹر فائنل میں پہنچ گئی۔ملتان کرکٹ اسٹیڈیم میں کھیلے گئے میچ میں پشاور ریجن کی ٹیم نے کوئٹہ ریجن کی ٹیم کو 126 رنز سے ہرا کر کوارٹر فائنل کیلئے کوالیفائی کیا۔
جمعہ کی رات کھیلے گئے میچ میں پشاور ریجن کی ٹیم نے پہلے کھیلتے ہوئے مقررہ 20 اوورز میں ایک وکٹ کے نقصان پر 239 رنز بنائے۔پشاور ریجن کے صاحبزادہ فرحان نے 72 گیندوں پر 14 چوکوں اور 11 چھکوں کی مدد سے 162 رنز ناٹ آؤٹ کی ریکارڈ اننگز کھیلی، جو ٹی ٹوئنٹی مقابلوں میں کسی بھی پاکستانی بیٹر کی سب سے بڑی انفرادی اننگز ہے،اس سے قبل یہ ریکارڈ کامران اکمل کا تھا جنہوں نے 2017 میں لاہور وائٹس کی طرف سے اسلام آباد کے خلاف150 رنز ناٹ آؤٹ سکور کیے تھے۔
صاحبزادہ فرحان نے یہ اننگز کھیل کر ٹی ٹوئنٹی مقابلوں میں کسی بھی ایشین بیٹر کے سب سے بڑے انفرادی اسکور کا ریکارڈ بھی برابر کردیا جو افغانستان کے حضرت اللہ ززئی نے 2019ء میں آئرلینڈ کے خلاف 162 رنز ناٹ آؤٹ بناکر قائم کیا تھا۔پشاور کے 20 اوورز میں ایک وکٹ پر239 رنز میں معاذ صداقت کے54 رنز بھی شامل تھے۔جواب میں کوئٹہ کی ٹیم ہدف کے تعاقب میں 113 رنز بناکر آؤٹ ہوگئی۔
کوئٹہ کی جانب سے عبدالواحد 46 رنز بنا کر نمایاں رہے۔پشاور کے عثمان طارق نے17 رنزدے کرچار وکٹیں حاصل کیں ،نظر علی نے تین،محمد عمران جونیئر نے دو اور محمد عامر خان نے ایک کھلاڑی کو آوٹ کیا۔صاحبزادہ فرحان پلیئر آف دی میچ قرار پائے۔واضح رہے کہ ٹورنامنٹ کوراٹر فائنل مرحلے میں پہنچ چکا ہے،
پہلے کوارٹر فائنل میں لاہور وائٹس اور ایبٹ آباد مدمقابل ہونگے۔دوسرا کوراٹر فائنل کراچی وائٹس اور ملتان ریجن کے درمیان کھیلا جائے گا،تیسرا کوارٹر فائنل فیصل آباد اور پشاور جبکہ چوتھے کوراٹر فائنل میں سیالکوٹ اور لاہور بلوز ٹکرائیں گے۔
Short Link: https://urdu.app.com.pk/urdu/?p=575322
