کراچی۔ 07 دسمبر (اے پی پی):نیشنل ٹی ٹوئنٹی کپ کے سپر 8مرحلے میں پشاور، کراچی وائٹس اور ایبٹ آباد نے کامیابیاں حاصل کرلیں۔یوبی ایل اسپورٹس کمپلیکس میں جمعرات کے روز کھیلے گئے میچ میں پشاور نے راولپنڈی کو 7 وکٹوں سے ہرادیا پشاور کی یہ مسلسل چھٹی کامیابی ہے۔راولپنڈی کی ٹیم ٹاس جیت کر پہلے بیٹنگ کرتے ہوئے 19اوورز میں صرف 107رنز بناکر آئوٹ ہوگئی۔کپتان عمرامین 31رنز بناکر ٹاپ اسکورر رہے۔لیفٹ آرم فاسٹ بولر محمد عمران نے صرف 16رنز دے کر6وکٹیں حاصل کیں،نیاز خان نے دو کھلاڑیوں کو آئوٹ کیا،پشاور نے 13.2اوورز میں 3وکٹوں کے نقصان پر مطلوبہ اسکور پورا کرلیا۔
صاحبزادہ فرحان نے اپنی شاندار فارم کو جاری رکھتے ہوئے 4 چوکوں اوراتنے ہی چھکوں کی مدد سے47رنز اسکور کیے۔افتخار احمد 30رنز بناکر ناٹ آئوٹ رہے جس میں 2 چوکے اور ایک چھکا شامل تھا،محمد نواز نے 2 وکٹیں حاصل کیں۔محمد عمران کو ان کی شاندار بولنگ پر پلیئر آف دی میچ قرار دیا گیا۔این بی اسپورٹس کمپلیکس میں کراچی وائٹس نے فاٹا کو 8 وکٹوں سے شکست دیدی۔فاٹا کی ٹیم 8وکٹوں پر139رنز بناسکی۔ کاشف نور نے2 چوکوں اوراتنے ہی چھکوں کی مدد سے32رنز بنائے۔لیگ اسپنر عارف یعقوب نے25رنز دے کر4 وکٹیں حاصل کیں۔دانش عزیز نے 2 کھلاڑی آئوٹ کیے۔ عمیربن یوسف نے 3 کیچز کیے۔
جواب میں کراچی وائٹس نے 19اوورز میں2وکٹوں پر مطلوبہ اسکور پورا کرلیا۔عماد عالم نے 5 چوکوں اور2 چھکوں کی مدد سے 53رنز بنائے۔خرم منظور نے 6 چوکوں کی مدد سے49رنز اسکور کیے۔ان دونوں نے پہلی وکٹ کی شراکت میں 105رنز کا اضافہ کیا۔اعظم خان کے23رنز ناٹ آئوٹ میں 2 چوکے اور اتنے ہی چھکے شامل تھے۔عارف یعقوب نے پلیئر آف دی میچ ایوارڈ حاصل کیا۔نیشنل بینک اسٹیڈیم میں ایبٹ آباد نے لاہور وائٹس کو22رنز سے ہرادیا۔ ایبٹ آباد نے پہلے بیٹنگ کرتے ہوئے 6وکٹوں پر 205رنز بنائے۔ فخرزمان کے صفر پر آئوٹ ہونے کے بعد سجادعلی اور کامران غلام نے دوسری وکٹ کی شراکت میں 166رنز کا اضافہ کیا۔
سجاد علی نے 51گیندوں پر 90رنز کی اننگز کھیلی جس میں 8چوکے اور6چھکے شامل تھے۔کامران غلام نے 47گیندوں پر7چوکوں اور 6چھکوں کی مدد سے87رنز بنائے۔عامرخان نے35 رنز دے کر4وکٹیں حاصل کیں۔جواب میں لاہور وائٹس 8وکٹوں پر183رنز بناسکی۔محمد فائق نے 35گیندوں پر 63رنز بنائے جس میں 12چوکے شامل تھے۔ سعد نسیم نے4چوکوں اوراتنے ہی چھکوں کی مدد سے 57رنز کی اننگز کھیلی۔شہاب نے 33رنز دے کر 4وکٹیں حاصل کیں۔ عادل ناز اور فیاض خان کے حصے میں دو دو وکٹیں آئیں۔سجاد علی کو پلیئر آف دی میچ قرار دیا گیا۔
Short Link: https://urdu.app.com.pk/urdu/?p=417865
